Die Tour de France (Frans: [tuʁ də fʁɑ̃s], letterlik: "Toer deur Frankryk") of kort Le Tour ([ləˈtuːʀ], "die toer"), ook Grande Boucle ([gʀɑ̃dˈbukl], "Groot Lus") genoem, is die bekendste en belangrikste fietswedren ter wêreld. Die wedren strek oor drie weke – dus eintlik 'n toer – en vind altyd gedurende Julie plaas. Die eerste wedren het in 1903 plaasgevind en gedurende 2018 het die wedren vir die 105de keer plaasgevind; dit is net tydens die Eerste en Tweede Wêreldoorlog, asook die wêreldwye Covid-19-pandemie gekanselleer. Alhoewel die roete jaarliks gewysig word, lei dit deur die hele Frankryk en aangrensende lande. Saam met die Toer van Italië (Giro d'Italia) en die Toer van Spanje (Vuelta a España) vorm dit deel van die Groot Drie Toere. Die wenner is die ryer met die minste totale tyd na afloop van die toer; elke skof se tyd word bymekaar getel. Die wenner kry die Geeltrui. Die wenspan is die span met die minste totale tyd na afloop van die toer; die beste drie ryers se tye van elke span word vir elke skof bymekaar getel.

Fietsryers tydens die Tour de France in 2005
Die geel trui
Chris Froome, viermalige wenner van die Tour de France

Wenners vanaf 2000 wysig

Jaar Wenner Nasionaliteit
2000 Lance Armstrong   Verenigde State
2001 Lance Armstrong   Verenigde State
2002 Lance Armstrong   Verenigde State
2003 Lance Armstrong   Verenigde State
2004 Lance Armstrong   Verenigde State
2005 Lance Armstrong   Verenigde State
2006 Óscar Pereiro   Spanje
2007 Alberto Contador   Spanje
2008 Carlos Sastre   Spanje
2009 Alberto Contador   Spanje
2010 Andy Schleck*   Luxemburg
2011 Cadel Evans   Australië
2012 Bradley Wiggins   Verenigde Koninkryk
2013 Chris Froome   Verenigde Koninkryk
2014 Vincenzo Nibali   Italië
2015 Chris Froome   Verenigde Koninkryk
2016 Chris Froome   Verenigde Koninkryk
2017 Chris Froome   Verenigde Koninkryk
2018 Geraint Thomas   Verenigde Koninkryk
2019 Egan Bernal   Colombia
2020 Tadej Pogačar   Slowenië
2021 Tadej Pogačar   Slowenië
2022 Jonas Vingegaard   Denemarke
2023 Jonas Vingegaard   Denemarke
  • Die titel is eers in 2012 aan Andy Schleck toegeken nadat Alberto Contador gediskwalifiseer is vir 'n positiewe opkikker-toets.[1]

Suid-Afrikaners in die Tour de France wysig

 
Daryl Impey tydens die Tour de France 2013 in die geeltrui

Robbie Hunter en John-Lee Augustyn was die eerste twee Suid-Afrikaners wat aan die Tour de France deelgeneem het. Robbie Hunter is die eerste Suid-Afrikaner nog wat 'n skof kon wen in die Tour de France en wel gedurende die 2007-toer. Daryl Impey het aan die 2012-toer deelgeneem en gedurende die 2013-toer die geeltrui gedra na die sesde skof, die eerste Suid-Afrikaner wat dit kon vermag. Tydens die 2019-toer het Daryl Impey die negende skof gewen en die tweede Suid-Afrikaner geword wat dit kon vermag.

Sien ook wysig

Verwysings wysig

  1. Beeld. Andy Schleck uit Tour de France 13 Junie 2012

Eksterne skakels wysig

  • (fr) Amptelike webwerf
  • (en) "Tour de France". Encyclopædia Britannica. Besoek op 21 September 2020.