Turbo-folk
Turbo-folk is 'n musikale genre wat sy oorsprong in Serwië (Suidoos-Europa) het. Alhoewel dit nog sterk met Serwiese musikante verbind word, het dit intussen ook in ander lande op die Balkan-skiereiland, waaronder Bosnië en Herzegowina, Slowenië, Kroasië en Montenegro gewild geword. Verwante musiekstyle is Laïka en Skyladiko in Griekeland, Manele in Roemenië en Chalga in Bulgarye.
Turbo-folk het in die laat 1970's as 'n subgenre van folkmusiek begin ontwikkel. Tradisionele volksmusiek is met dans en/of elemente van popmusiek (soos pop-folk, dans-pop, rock- en tegno-musiek) vermeng en elektroniese musiekinstrumente ingespan. Turbo-folk is in die vroeë 1990's met nasionalistiese neigings in die voormalige Joego-Slawië verbind, maar het intussen gedepolitiseer sodat die bemarking van turbo-folk-kunstenaars oor landsgrense heen vergemaklik is.
Ontwikkeling wysig
Die ontwikkeling van turbo-folk het in die laat 1970's begin. Tot daardie tyd is volksmusiek (Narodna Muzika) hoofsaaklik met tradisionele musiekinstrumente soos akkordeon gespeel. Die klassieke kontrabas was die belangrikste basinstrument, die slagwerk was in enkele gevalle 'n snaredrum, maar meestal bongo's. Vanaf die middel van die 1970's het 'n verskeidenheid vorme van volksmusiek ontstaan wat soms deur 'n hele orkes ondersteun is, veral in die musikale werk van die sanger Šaban Šaulić. Die meeste musikante uit hierdie periode het egter intussen in vergetelheid geraak.
Vooruitgang op die gebied van ateljeetegniek en elektroniese instrumente het ook die ontwikkeling van Joego-Slawiese volksmusiek geraak. Geleidelik het ook die jonger generasie begin belangstel in hierdie genre en sodoende bygedra tot sy verandering.
Eksterne skakels wysig
Media / klankmonsters