'n Vredespaal is 'n handgemaakte monument wat die boodskap "Mag Vrede Seëvier op Aarde" gewoonlik in 4 of meer tale vertoon. Daar is tienduisende vredespale in 180 lande dwarsoor die wêreld toegewy as monumente vir vrede.[1] Vredespale word meestal uit hout gemaak, maar kan ook van ander materiale soos byvoorbeeld kalksteen, vlekvrye staal of koper gemaak word.[2]

'n Vredespaal in Japan

Vredespale is aan talle internasionale organisasies en regerings aangebied, om 'n vredeskultuur in die wêreld te bevorder. Vredesliefhebbers van verskeie gelowe en regeringsorganisasies, asook ander bekendes, was al betrokke by vredespaaltoewydings, onder andere die Tenzin Gyatso, Moeder Teresa, president Jimmy Carter, Deepak Chopra en John Denver, en burgemeesters.[3]

Geskiedenis wysig

Die universele boodskap vir wêreldvrede, "Mag Vrede Seëvier op Aarde" (Engels: May Peace Prevail on Earth) is in 1955 deur wyle Masahisa Goi van Japan geskryf en aan die wêreld bekend gemaak. Ondersteuners van dié boodskap het byeenkomste begin hou en die beweging het momentum in Japan gekry. Plakkers en plakkate met die boodskap het in openbare plekke verskyn en ondersteuners het literatuur daaroor uitgedeel.[4]

Goi het kreatiewe maniere om die boodskap oor te dra aangemoedig, en in 1976 het die idee van die plasing van sy boodskap op vredespale gewild geraak. Met die afsterwe van Goi in 1983, het sy aangenome dogter, Masami Saionji, voorsitter van die The World Peace Prayer Society geword en die beweging internasionaal uitgebrei.[5]

Die eerste vredespale buite Japan het in die vroeë 1980's dwarsoor die wêreld begin verskyn. In 1986 was die Peace Pole Project in die Verenigde State van Amerika gestig, gevolg deur vredespaalaktiwiteite in Europa en die res van die wêreld.

In 1988 word die World Peace Prayer Society ingelyf as 'n nie-winsgewende, nie-sektariese organisasie en vestig sy hoofkwartier in New York. In 1990 word dié vereniging aanvaar as 'n nie-regeringsorganisasie (NRO) in samewerking met die Departement van Openbare Inligting van die Verenigde Nasies.

Prominente plekke wysig

Daar is vredespale op die Allenbybrug tussen Israel en Jordanië; by die Peace Park waar 84 vredespale die Olimpiese Spele in Salt Lake City in die VSA herdenk, by die oorlogsmuseum in Viëtnam; op Robbeneiland in Suid-Afrika; by die piramides van Giza in Egipte; op die terrein waar Jesus gedoop is by Al-Maghtas; en by skole, kerke, sinagoges, moskees en tempels dwarsoor die wêreld.[3]

Teenstand wysig

'n Konfrontasie vind in 1989 plaas, toe Kaapstadse burgemeester, Peter Muller,[6] deelneem aan 'n vredespaalplanting op Tafelberg. Die Table Mountain Celebration Group het aangevoer dat die paal 'n simbool van vrede was terwyl 'n fundamentalistiese Christengroep daarteen geprotesteer het omdat hulle geglo het dat die pale verbind word met demoniese aanbidding.[7]

Fotogalery wysig

Verwysings wysig

  1. "The Peace Pole Project: Planting the Universal Message of Peace" (in Engels). Geargiveer vanaf die oorspronklike op 23 Oktober 2018. Besoek op 21 Maart 2017.
  2. "peace-pole.com" (in Engels). Geargiveer vanaf die oorspronklike op 9 Oktober 2019. Besoek op 21 Maart 2017.
  3. 3,0 3,1 "The Peace Pole Project: International organizations and governments" (in Engels). Geargiveer vanaf die oorspronklike op 23 Oktober 2018. Besoek op 21 Maart 2017.
  4. "The World Peace Prayer Society: History of May Peace Prevail on Earth" (in Engels). Geargiveer vanaf die oorspronklike op 20 Desember 2018. Besoek op 21 Maart 2017.
  5. "The World Peace Prayer Society: Chairperson" (in Engels). Geargiveer vanaf die oorspronklike op 15 Desember 2018. Besoek op 21 Maart 2017.
  6. Jonker, Kobus (1991). Satanisme, 'n realiteit. Port Elizabeth.{{cite book}}: AS1-onderhoud: plek sonder uitgewer (link)