Maak hoofkeuseskerm oop

Walker Evans (* 3 November 1903 in St. Louis, Missouri; † 10 April 1975 in New Haven, Connecticut) was 'n Amerikaanse fotograaf wat veral bekendheid verwerf het met sy fotowerk wat tussen 1935 en 1938 in opdrag van die Farm Security Administration (FSA) in landboustreke van die Amerikaanse Suide ontstaan het en waarmee hy die sosiale uitwerkings van die Groot Depressie gedokumenteer het. Die meeste foto's uit Evans se FSA-werkperiode is met 'n grootformaat-8x10-duim-kamera afgeneem.

Walker Evans
’n Beeld van die betrokke persoonlikheid.
Walker Evans in 1937

Gebore 3 November 1903
St. Louis, Missouri, VSA
Oorlede 10 April 1975 (op 71)
New Haven, Connecticut, VSA
Nasionaliteit Vlag van Verenigde State van Amerika Verenigde State
Ouers Jessie (née Crane) en Walker Evans
Beroep Fotograaf
Bekend vir Fotowerk vir die Farm Security Administration (FSA)
Floyd Burroughs, 'n katoendeelsaaier in Alabama, omstreeks 1935 of 1936
Let Us Now Praise Famous Men: Three Tenant Families

Walker Evans word as een van die invloedrykste kunstenaars van die 20ste eeu beskou.[1] Sy elegante, realistiese, dokumentêre styl het skerp verskil van die ouer generasie fotograwe, onder wie Alfred Stieglitz, wat fotografie as 'n suiwer kunsvorm (pictorialisme) beoefen het wat aan skilderkuns gelykgestaan het - meesterlik in elk geval, waarby hulle die skilderkwas met 'n kameralens kon vervang. Evans se fotokuns is uniek danksy sy buitengewone vermoë om die teenswoordige tyd met sy kamera op 'n manier vas te hou wat dit soos dokumente uit die verlede laat lyk. Hy het Amerika se stowwerige paaie gevolg om toonvensters van winkels, advertensieborde en lankal vergete plakkate, die vroeë motorkultuur, en die interieur van wonings af te neem. Sy tydlose kuns het as inspirasie gedien vir generasies van kunstenaars, van Helen Levitt en Robert Frank tot Diane Arbus, Lee Friedlander, en Bernd en Hilla Becher.

In 1936 het hy saam met die skrywer, joernalis en sosiale aktivis James Agee deur die Suidstate gereis om foto's van arm huurboere vir 'n artikel in die tydskrif Fortune te neem. Vier weke lank het Evans en Agee met drie gesinne - die Burroughs, Fields en Tengles - saamgewoon en hul vertroue gewen om 'n diepgaande en intieme dokumentêre verhaal van hul daaglikse lewe as katoendeelsaaiers in landelike Alabama te skep. Uit dié samewerking het die befaamde dokumentêre boek Let Us Now Praise Famous Men voortgespruit waarvan die eerste uitgawe in 1941 verskyn het.[2]

Gedurende sy hele loopbaan het Evans se dokumentêre foto's in 'n groot verskeidenheid publikasies verskyn, waaronder drie wat uitsluitlik aan sy werk gewy was. Ná twintig jaar se werk as fotoredakteur van Fortune is Evans in 1965 deur die Yale-universiteit as professor in fotografie en grafiese ontwerp aangestel - 'n pos wat hy tot 1974 beklee het.

Volgens Evans was sy doelwit as fotograaf om foto's te skiet wat "gesofistikeerd, gesaghebbend, buitengewoon" is. Baie van sy werke maak tans deel uit van die permanente versamelings van museums en is daarnaas deur instellings soos die Metropolitan Museum of Art en George Eastman House tydens retrospektiewe uitstallings vertoon.

VerwysingsWysig

Eksterne skakelsWysig