Maak hoofkeuseskerm oop

William Faulkner (1897–1962) het deur die merkwaardige vermenging van naturalisme, simbolisme en melodrama in sy werk van die grootste en boeiendste romans oor die suidelike state ("Deep South") van die VSA geskryf. In 1949 het hy die Nobelprys vir Letterkunde ontvang vir sy omvangryke oeuvre waarin hy 'n unieke fantasiewêreld geskep het: Yoknapatawpha County.[1]

William Faulkner
’n Beeld van die betrokke persoonlikheid.
William Faulkner in 1954, foto geneem deur Carl Van Vechten

Geboortenaam William Cuthbert Falkner
Gebore (1897-09-25)25 September 1897
New Albany, Mississippi
Oorlede 6 Julie 1962 (op 64)
Byhalia, Mississippi
Nasionaliteit Vlag van Verenigde State van Amerika Verenigde State
Ouers Murry Cuthbert Falkner en Maud Butler
Beroep Skrywer
Bekend vir The Sound and the Fury (1929)
As I Lay Dying (1930)
Light in August (1932)
Absalom, Absalom! (1936)
"A Rose for Emily" (1930)
Eerbewyse Nobelprys vir Letterkunde (1949)
Pulitzerprys vir Fiksie (1955, 1963)
Nasionale Boekprys (1951, 1955)
Huweliksmaat Estelle Oldham (h. in 1929)
Handtekening Faulkner signature.png

William Cuthbert Faulkner is op 25 September 1897 in New Albany, Mississippi, gebore. Na sy hoërskooldae het hy in sy oupa se bank gewerk en aan die Universiteit van Mississippi gestudeer. In die Eerste Wêreldoorlog was hy 'n luitenant in die Kanadese lugmag, hoewel hy geen aktiewe diens gedoen het nie omdat vrede gesluit is voordat sy opleiding voltooi was. Na die oorlog was hy onder meer 'n matroos en skrynwerker voordat hy as joernalis na New Orleans is. Daar het Sherwood Anderson hom gehelp om sy eerste roman, Soldier's Pay (1926), te skryf.

Drie jaar later is hy terug na Oxford, Mississippi, waar hy met Estelle Oldham getroud is en as stoker begin werk het. Nadat hy as skrywer bekend geword het. het hy verskeie uitnodigings ontvang: 'n tyd lank was hy gasdosent in Japan en aan die Universiteit van Virginia. Faulkner se eerste werk, 'n digbundel getiteld The Marble Faun, is in 1925 gepubliseer. Die tydperk in New Orleans word weerspieël in New Orleans Sketches, die satiriese roman Mosquitoes (1927) en Pylon (1935). Met Sartoris (1929) het hy sy bekende romansiklus begin oor die denkbeeldige Yoknapatawpha County vandat die eerste setlaars daar aangekom het tot die middel van die 20ste eeu. In die siklus, waarin die gesinne Sartoris, Compson, McCaslin en Snopes sentraal staan, beskryf Faulkner die suide van die VSA, waar die ou tradisies te gronde gaan weens die verderflike invloede van binne (die slawerny en die grondhonger) en die hebsug van die Yankees en die armblankes. Die verhouding tussen Blank en Swart, Suide en Noorde, aristokraat en armblanke word gebruik om die tema van die verhouding tussen sosiale orde en natuurlike chaos uit te bou. In The Sound and the Fury (1929) word die verhaal op 'n tegnies interessante manier uit verskillende oogpunte beskou.

As I lay dying (1930) gaan oor die onderlinge verhoudinge in 'n gesin. In Sanctuary (1931) en die daaropvolgende Requiem for a Nun (1951) word die klem gelê op dekadensie en verderf, terwyl The Hamlet (1940), The Town (1957) en The Mansion (1959) veral oor die Snopes-gesin handel. Light in August (1932) word dikwels as sy grootste roman naas The Sound and the Fury beskou. Van sy ander werk is onder meer Absalom (1936), The wild Palms (1939), A Fable (1954), The Rivers (1962), 'n bundel kortverhale Go down, Moses (1942), 'n digbundel The green bough (1933) en Essays, speeches and public letters (1965).

VerwysingsWysig

  1. (en) "The Nobel Prize in Literature 1949". Nobelprize.org. Besoek op 4 September 2019.

BronnelysWysig

Eksterne skakelsWysig