Yarragadee bron

Die Yarragadee Bron is 'n varswater grondwaterbron in die suidweste van Wes-Australië en is hoofsaaklik onder die Swan kusvlakte wes van die Darling eskarp geleë. Dit strek van noord na suid vanaf ongeveer waar Geraldton geleë is tot by die suidkus, maar met 'n onderbreking in die formasie net suid van Perth.

Die grondwaterbron is verskeie honderde meters onder grondvlak geleë met 'n wisselende dikte van tot en met ongeveer 2 kilometer.

In die Perth gebied is die Yarragadee grondwaterbron onder die Leederville grondwaterbron geleë wat self onder twee ander oppervlakkige bronne geleë is. Hierdie bronne word geskei deur ondeurdringbare grondlae.

Die Yarragadee grondwaterbron stoor ongeveer 1000 kubieke kilometer water. Dit word daarom as 'n waterbron benut en die Water Corporation van Wes-Australië onttrek ongeveer 45 gigaliter per jaar uit die bron. Een kubieke kilometer is ongeveer 1000 gigaliter.

Die Yarragadee bron word uiteindelik deur reënval aangevul. Hierdie aanvulling geskied deur breuke naby ander bronne soos onder andere die Leederville bron. Daar is ook onderbreking in die lae in die omgewing van die Blackwood-rivier. Tans beraam modelle die aanvulling van die bron op ongeveer 280 tot 340 GL per jaar. Hierdie grondwater bly soms baie jare in die bron en in sommige gebiede is die grondwater meer as 30 000 jaar oud.

Geologies is die bron deel van wat bekend staan as die Yarragadee formasie, wat 'n relatief dik geologiese eenheid in die Perth-kom is. Dit is in die Jurassiese tydperk gevorm en bestaan hoofsaaklik uit poreuse sandsteen.

Verwysings

• "The Water Supply in Perth, Australia". Geargiveer vanaf die oorspronklike op 1 Mei 2007. Besoek op 10 April 2007.
• "Verskeie verslae oor grondwaterbronne in Wes-Australië". Geargiveer vanaf die oorspronklike op 19 November 2008. Besoek op 30 Desember 2008.
• "South West Yarragadee Aquifer (South West Aquifer Modelling System)" (PDF). Geargiveer vanaf die oorspronklike (PDF) op 21 Augustus 2006. Besoek op 10 April 2007.
• "South West Yarragadee Blackwood Groundwater Area (Department of Environment and Conservation)" (PDF). Besoek op 10 April 2007.^{[dooie skakel]}
• "Yarragadee Aquifer Geology report, 115kb pdf" (PDF). Geargiveer vanaf die oorspronklike (PDF) op 1 Julie 2005. Besoek op 10 April 2007.
• "Yarragadee Community Action Site". Geargiveer vanaf die oorspronklike op 9 Februarie 2008. Besoek op 15 November 2007.