Jimmy Abbott
Jimmy Abbott (11 Mei 1959 – 21 Maart 2021) was 'n Suid-Afrikaanse swaargewigbokser, rofstoeier en evangelis.
| Jimmy Abbott | |
| Statistiek | |
|---|---|
| Bynaam(e) | 'Jumbo' |
| Gewigklas | Swaargewig |
| Lengte | 1,96 m |
| Nasionaliteit |  Suid-Afrika
|
| Geboorte | 11 Mei 1959 |
| Sterfte | 21 Maart 2021 Heidelberg |
| Houding | Links |
| Boksrekord | |
| Totale gevegte | 26 |
| Oorwinnings | 19 |
| Oorwinnings met uitklophou | 16 |
| Verloor | 5 |
| Gelykop | 2 |
| Geen wedstryd | 0 |
Biografie wysig
Jimmy Abbott was 'n suksesvolle amateurbokser en wen die swaargewigamateurtitel in die Suid-Afrikaanse kampioenskap in 1976 en 1977. Hy het Wes-Transvaal verteenwoordig. Jimmy is ook in 1977 bekroon met die Suid-Afrikaanse amateurboksvereniging se merietekleure en ontvang 'n Springbokbaadjie.
Jimmy het sy beroepsboksloopbaan op 2 Junie 1978 in Bloemfontein begin en Frans Manyiso in die vierde ronde geklop. In sy eerste jaar as professionele bokser, het hy uitstekend gevaar met sewe oorwinnings beklink waarvan vyf voor die laaste rondte, teen Jeff Ellis, Wiets de Beer, Robbie Williams, Fraser Memela, Terry O'Connar (Engeland), Tom Kiely (Engeland) en Caiphus Masondo.
In 1979 het hy voortgebou op sy sukses en nog sewe gevegte gewen. 'n Hoogtepunt was sy uitklopoorwinning in die derde ronde teen die bekwame Amerikaner Dave Johnson (13-2), tydens die voorgeveg van die stryd tussen John Tate en Suid-Afrika se Kallie Knoetze in die Onafhanklikheidsstadion in Mmabatho op 2 Junie 1979.
Hy het sy eerste geveg in September 1979 teen Eddie Lopez (15-2-1) oor tien rondes met punte verloor. Jimmy het sy volgende twee gevegte gewen voordat hy Kallie Knoetze op 3 Augustus 1980 vir die vakante Transvaal-swaargewigtitel ontmoet het in een van die destydse mees afgewagte swaargewiggevegte voor 'n propvol Ellis Park Tennisstadion. Abbott was in uitstekende vorm toe hy Knoetze in die eerste ronde uitgeslaan het. Hy het egter met sy gewig gesukkel wat hom dwarsdeur sy loopbaan geknou het, en later in sy lewe het hy net drie van sy volgende nege gevegte gewen.
In Desember 1995 is hy in Newlands, Johannesburg, as pastoor ingehuldig. Hy het later sy eie evangelisasie organisasie, Jimmy Abbott Ministries begin.
Abbott het vanaf 2013 ernstig begin sukkel met sy gesondheid na 'n beroerte. Op 21 Maart 2021 sterf hy op die ouderdom van 61 by sy huis in Heidelberg aan hartversaking.
Bronne wysig
- Swaargewigbokskampioen Jimmy Abbott oorlede, Maroela Media, 22 Maart 2021. https://maroelamedia.co.za/nuus/sa-nuus/swaargewigbokskampioen-jimmy-abbott-oorlede/
- Jimmy Abbott dies at 61, 22 Maart 2021, https://supersport.com/boxing/news/210322_Jimmy_Abbott_dies_at_61
- Former South African heavyweight turned preacher Jimmy Abbott dies, Mesuli Zifo, 22 Maart 2021. https://www.timeslive.co.za/sport/2021-03-22-former-south-african-heavyweight-turned-preacher-jimmy-abbott-dies/