Polydoros (seun van Priamos)
Polydoros of Polydorus (Grieks: Πολύδωρος, "besonder begaafd") is die jongste seun van Priamos in die mitologie van die Trojaanse Oorlog. Terwyl Homeros sy moeder aanteken as Laothoe, teken latere bronne sy moeder aan as Hekabe. Polydoros is 'n voorbeeld van die vloeibare aard van die mite, aangesien sy rol en verhaal wesenlik verskil in verskillende tradisies en bronne.
Mitologie wysig
In die Ilias wysig
In Homeros se Griekse epos Die Ilias word Polydoros vlugtig uitgebeeld as 'n vyand van Achilles. Volgens hierdie bron was Polydoros die jongste seun van Priamos, en dus wou sy vader hom nie laat veg nie. Achilles sien hom egter op die slagveld met sy groot spoed deur die linies hardloop, en beseer hom noodlottig met 'n spies. Hektor, wat sy broer se dood aanskou, daag hierop vir Achilles uit.[1]
In Hecuba en die Metamorfoses wysig
In Euripides se tragedie Hecuba is Polydoros se spook 'n karakter, en sy dood is die oorsaak van die hoofkonflik van die toneelstuk. Polydoros se spook bied die proloog van die toneelstuk aan en verduidelik dat hy na Thracië gestuur is onder die beskerming van koning Polymestor, ingeval Troje sou val. Saam met sy seun het Priamos goud gestuur sodat, indien Troje sou val, sy seun kon voortgaan om homself te onderhou. Toe Troje egter geval het, het Polymestor Polydoros doodgemaak deur hom in die see te gooi en die goud gesteel. Polydoros betreur die feit dat sy liggaam in die see dryf sonder die behoorlike doodsrites wat gevolg is.
Later in die toneelstuk vertel 'n slavin vir Hekabe dat Polydoros se liggaam uitgespoel het en aan die kus gevind is. Hekabe verduidelik dat sy Polydoros se moordenaar in 'n droom gesien het en dat dit Polymestor is. Bygestaan deur Agamemnon en die ander gevangene vroue, gaan Hekabe voort om haar seun se moord te wreek deur Polymestor se seuns te dood en hom te verblind.[2] Dieselfde verhaal oor Polydoros is die onderwerp van 'n deel van Ovidius se Metamorfoses.[3]
In die Eneïde wysig
In Vergilius se Romeinse epos Die Eneïde beland Aeneas in Thracië met die hoop om 'n kolonie vir sy volk te stig. Die land is begroei met verskeie plante, en soos Aeneas begin om 'n bos Mirte te ontwortel wat hy op 'n geheimsinnige heuwel sien groei, sodat hy 'n altaar wat hy pas met die takke gemaak het kan beskerm, begin die takke bloed te spuit. Hierna begin die plant te praat, en verduidelik dat dit Polydoros is - die spiese wat gebruik is om hom te dood het in die grond vasgesteek, wortel geskiet en in plante verander. Die plant verduidelik dat Priamos vir Polydoros na Thracië gestuur het met betaling aan die Thraciese koning[4] sodat hy beskerm sou word as Troje sou val. Toe Troje wel val het die koning sy ooreenkoms met die Trojane verbreek, Polydoros vermoor om Agamemnon te behaag, en die geld behou. Aeneas gaan voort om Polydoros 'n behoorlike begrafnis te gee.[5][6]
In die Verhale wysig
Volgens Hyginus se "Verhale" (Fabulae) het Priamos en Hekabe Polydoros se opvoeding aan sy suster, Iliona[7] toevertrou. Sy was die vrou van Polymestor. Om Polydoros se veiligheid te verseker, het sy hom as haar eie seun grootgemaak, terwyl sy haar en Polymestor se ware seun, Deipylos, as haar broer grootgemaak het. Na die val van Troje het die Achajers aan Polymestor Agamemnon se dogter Elektra belowe indien hy Polydoros doodmaak. Polymestor het ingestem, maar as gevolg van die omruiling wat Iliona uitgevoer het, het hy egter vir Deipylos doodgemaak.
Soos wat die gebeure afgespeel het, het Polydoros na die orakel van Apollo gegaan om sy ware afkoms te verneem. Hier is daar vir hom gesê dat sy tuisstad vernietig is, dat sy vader (Priamos) vermoor is, en dat sy moeder gevange geneem is. Toe hy teruggekeer het huis toe, en steeds geglo het dat hy die seun van Polymestor en Iliona was, het hy vir Iliona gevra waarom die orakel verkeerd was, waarop sy vir hom die waarheid van sy voorgeslagte vertel het. Hy het hierop voortgegaan om Polymestor op sy suster se aandrang te verblind en te dood.[8]
Naamgenoot wysig
- Die asteroïde 4708 Polydoros is vernoem na Polydoros
Verwysings wysig
- ↑ Homeros, en Stanley Lombardo. Ilias. Indianapolis: Hackett Pub., 1997:399.
- ↑ Euripides, (Marilyn Nelson, vertaler) Hecuba. U Penn Press, 1998.
- ↑ Ovidius, Naso Publius (Alan D. Melville, vertaler) Metamorfoses. Oxford: Oxford-universiteit drukkers, 1986:307–12.
- ↑ Daar word aanvaar dat die koning Polymestor is hoewel hy nie uitdruklik genoem word nie.
- ↑ Vergilius (Robert Fitzgerald, vert.) Die Eneïde. New York: Knopf, 1992. Print. 66–67.
- ↑ Vergilius; met 'n Engelse vertaling deur H. Rushton Fairclough; in Twee Volumes (Eclogues, Georgics, Eneïde I-IV). Vol. 1. Cambridge en Londen: Harvard-universiteit drukkers en William Heinemann. 1938. p. 350-353. Besoek op 25 Januarie 2018 – via Internet Archive.
- ↑ Ilion is die alternatiewe naam van Troje.
- ↑ pseudo-Apollodorus, R. Scott Smith, Stephen Trzaskoma en C. Julius. Hyginus. Apollodorus' Library and Hyginus' Fabulae: Two Handbooks of Greek Mythology. Indianapolis: Hackett Pub., 2007:134.
Bronne wysig
- William Smith. A Dictionary of Greek and Roman biography and mythology vs .Polydorus. Londen. John Murray: gedruk deur Spottiswoode & Co., New-Street Square and Parliament Street. 1849.
- Apollodorus, R. Scott Smith, Stephen Trzaskoma en C. Julius. Hyginus. Apollodorus' Library and Hyginus' Fabulae: Two Handbooks of Greek Mythology. Indianapolis: Hackett Pub., 2007. Print.
- Euripides, en Marilyn Nelson. Hecuba. U Penn Press, 1998. Gedruk.
- Homeros, en Stanley Lombardo. Ilias. Indianapolis: Hackett Pub., 1997. Gedruk.
- Ovidius, Naso Publius, and Alan D. Melville. Metamorphoses. Oxford: Oxford University Press, 1986. Print.
- Vergilius, en Robert Fitzgerald. Die Eneïde. New York: Knopf, 1992. Gedruk
Eksterne skakels wysig
Wikimedia Commons het meer media in die kategorie Polydoros (seun van Priamos).
