Rotten Row

Rotten Row is 'n ruiterpad in Hyde Park in die middestad van Londen wat strek van Hyde Park Corner tot Coalbrookdale Gate. Dit is in 1690 aangelê om 'n veilige roete te verskaf aan koning Willem III as hy van die een na die ander paleis sou reis. Vermoedelik is die naam 'n verbastering van die Franse route du roi, die roete van die koning. In die 18de eeu het die pad ontwikkel tot die bymekaarkomplek van edelmanne en gesiene burgers met hul perde. Hierdie pad is die onderwerp van 'n bekende gedig deur Frederick Lampson.

'n Skildery van Thomas Blinks, ongeveer 1900

Rotten Row in 2005

James Kirkwood, na wie die dorp Kirkwood in die Oos-Kaap genoem is, het die woonbuurt van sy personeel op sy plaas Hillside in die Sondagsriviervallei ook Rotten Row genoem. Ten spyte van sy verduideliking dat die naam 'n aristokratiese konneksie het, het sy personeel ongelukkig gebly met die naamkeuse en het Kirkwood die naam gewysig.

Bron

• Logie, Bartle: Sundays – tales from a winding river. Port Elizabeth: Bluecliff,2011. ISBN 978-0-9870017-2-6