Île Sainte-Marie

Nosy Boraha, voorheen bekend as Île Sainte-Marie (en steeds algemeen so bekend onder reisigers), is ’n eiland aan die ooskus van Madagaskar, waarvan dit deel is. Die hoofdorp is Ambodifotatra. Die eiland vorm ’n administratiewe distrik in die Analanjirofo-streek en beslaan ’n oppervlakte van 222 km2. Dit is 60 km lank en minder as 10 km breed. Die eiland het in 2013 ’n bevolking van 26 547 gehad.[1]

Die ligging van Île Sainte-Marie in Noordoos-Madagaskar.
’n Bultrugwalvis naby Île Sainte-Marie, Julie 2013.
Die begraafplaas van ou seerowers op Île Sainte-Marie.

Die kanaal tussen Nosy Boraha en Madagaskar is ’n bekende plek om walvisse te sien. Aansienlike groepe bultrugwalvisse (genus Megaptera) migreer van Antarktika na dié broeiterrein.

Seerowers wysig

Île Sainte-Marie was van omstreeks 1685 af om verskeie redes ’n gewilde basis vir seerowers: Dit was naby die seeroetes waarlangs die skepe van Oos-Indië teruggekeer het met hul rompe vol skatte; die baaie het beskerming gebied tydens storms; daar was volop vrugte; en die waters was kalm. Legendariese seerowers soos William Kidd, Robert Culliford, Olivier Levasseur, Henry Every, Abraham Samuel en Thomas Tew het gewoon op île aux Forbans, ’n eiland in die baai van Île Sainte-Marie se hoofdorp.

Daar was ook gerugte dat die utopiese seerowerrepubliek Libertalia in dié gebied was, hoewel die ligging – of selfs bestaan – van die republiek onseker is.

Fauna en flora wysig

Omdat die eiland so afgeleë is, is daar unieke diere en plante. Daar is verskeie spesies lemurs en talle spesies orgideë, waaronder die "Koningin van Madagaskar" (Eulophiella roempleriana). Dit is sover bekend die enigste plek waar die Coua delalandei, ’n soort koekoek, voorgekom het. Dié spesie het in die laat 19de eeu uitgesterf.

Verwysings wysig

  1. Institut National de la Statistique, Madagascar.

Eksterne skakels wysig

Koördinate: 16°55′S 49°54′O / 16.917°S 49.900°O / -16.917; 49.900