Aanhalingstekens

Aanhalingstekens dui 'n spreker, skrywer of bron se direkte woorde aan. Dit dui ook op emotief belaaide teks of lig bepaalde inligting vir die leser uit. In Afrikaans vervul die enkel- ('...') en dubbelaanhalingstekens ("...") verskillende funksies.

Aangehaalde inligting

Dubbelaanhalingstekens dui 'n aanhaling aan, bv: "Ek is dolgelukkig."
Wanneer 'n aanhaling oorloop in meer as een paragraaf, word dubbelaanhalingstekens aan die begin van elke paragraaf geplaas, maar slegs aan die einde van die laaste paragraaf.
Enkelaanhalingstekens dui 'n aanhaling binne 'n ander aanhaling aan, bv: "Aan die einde van die gebed, het die dominee 'amen' gesê," bevestig sy.

Direkte rede

Dubbelaanhalingstekens dui woorde, frases of sinne in die direkte rede aan, bv: "Kom kry vir jou iets te ete," sê hy.
Enkelaanhalingstekens dui 'n aanhaling van ander dialoog in die direkte rede aan, bv: "Sy het hard 'eina!' uitgeroep," vertel hy.
Aanhalingstekens is nie nodig by interne dialoog nie, bv: Sy wou mos nie vir my luister nie, dink hy.

Uitgeligte inligting

Dubbelaanhalingstekens dui 'n woord, term, begrip, konsep of frase aan wat uitgelig en onder die leser se aandag gebring moet word, bv: Die berader het verduidelik wat "emosionele intelligensie" beteken.

Titels en name

Die titels van ongepubliseerde proefskrifte en verhandelings, artikels in tydskrifte, berigte in koerante, gedigte in digbundels, snitte op musiekalbums en skilderye kry dubbelaanhalingstekens.

Bv: Sy storie "Gister se kind" het onlangs in Rooi Rose verskyn.

Leenwoorde

Dubbelaanhalingstekens dui frases of woorde in ander tale, leenwoorde en sleng binne formele kontekste aan, bv: Ek "je t'aime" jou.

Bron

Afrikaanse woordelys en spelreëls, 2017. Kaapstad: Pharos