Adendorff-trek

Die Adendorff-trek was 'n groep Afrikaners wat 'n Boererepubliek oorkant die Limpoporivier in die destydse Suid-Rhodesië tot stand wou bring.

Die trek staan ook bekend as die Banyailand-trek. Die leier, ene Adendorff, het beweer hy het 'n vergunning van hoofman Chibi gekry, wat beheer oor grondgebied suid van die teenswoordige Masvingo (destyds Fort Victoria) uitgeoefen het. Adendorff wou 'n Boererepubliek oprig, maar hy kon dit net doen as hy die gesag van die British South Africa Company sou aanvaar. Op 24 Junie 1891 het 'n groep gewapende Afrikaners die Limpopo probeer oorsteek. Hulle is in hulle spore gestuit deur die polisie van die British South Africa Company.

Sommige lede van die trek het hulle later vreedsaam in Mashonaland gaan vestig.

Bron

• Akers, Mary (red.), Encyclopaedia Rhodesia, The College Press Pvt. Ltd., Salisbury, 1973.