Maak hoofkeuseskerm oop
Soldate saam met Athena en Hermes, c. 530 v.C. (Louvre, Parys).
Herakles en Athena deur Andokides, c. 520 v.C. (Staatliche Antikensammlung, München).

Die Andokides-skilder was ’n potskilder in Argaïese Griekeland wat van omstreeks 530-515 v.C. aktief was.[1] Hy het nie sy werke onderteken nie; hy is genoem na Andokides, die pottebakker vir wie hy gewerk het. Hy was waarskynlik die uitvinder van die rooifiguurstyl in potskildering.

’n Nuwe stylWysig

Andokides het begin werk in die tyd toe die swartfiguurstyl in potskildering oorheers het. Hy was waarskynlik ’n student van Exekias, ’n meester van die kunsvorm. Die swartfiguurstyl, waarin detail met inkepings geskep is, het omstreeks die laat 6de eeu v.C. sy tegniese perke bereik. Die Andokides-skilder het ná ’n paar toetse met wit verf die proses omgeruil: hy het die agtergrond swart geverf in plaas van die figure. Die figure is in rooi verf aangebring en besonderhede kon dus duideliker daarop aangebring word met ’n fyn kwas en donkerder verf.

Die eerste bewyse van dié nuwe tegniek – wat stelselmatig versprei en die kuns later oorheers het – dateer uit 530 v.C. Tydens ’n oorgangstyd het die Andokides-skilder potte gemaak met die swartfiguurstyl aan die een kant en die rooifiguurstyl aan die ander kant. Dit was vermoedelik toetsstukke waarmee het die nuwe tegniek aan klante gewys het. Daarna het hy net die nuwe tegniek gebruik.

Ook ander kunstenaars het dié styl gevolg, maar die meeste kenners stem saam dat die Andokides-skilder se werke ’n paar jaar ouer is as dié van die ander kunstenaars, wat beteken hy was waarskynlik die uitvinder van die tegniek.

Die Andokides-skilder se gunsteling-onderwerp was mitologiese tonele met gode en helde. Herakles was sy geliefkoosde karakter.

VerwysingsWysig

  1. Boardman, J. Athenian Red Figure Vases: The Archaic Period. Londen: Thames and Hudson, 1975. p. 15.

BronneWysig

  • Beazley, John. Attic Black-figure Vase-Painters. Oxford: Clarendon Press, 1956.
  • Boardman, J. Athenian Black Figure Vases: A Handbook. Londen: Thames and Hudson, 1974.
  • Williams, D. (1985). Greek Vases. Londen: British Museum Press, 1999.
  • Tansey, R. en F. Kleiner. 1996: Gardner's Art Through the Ages – 10de uitg., VSA: Harcourt Brace College, 136-137.

Eksterne skakelsWysig