Arderne-tuin

Die Arderne-tuin is 'n stadspark in Claremont, Kaapstad. Dit bevat die uniekste arboretum in die suidelike halfrond en is in 1979 tot gedenkwaardigheid verklaar.

'n Norfolkden

'n Grootblaarvy (Ficus macrophylla)

Ligging

Die park lê in die hartjie van Claremont, tussen Hoofweg en Herschelweg en tussen die Herschel-skole.

Gebruik

Hierdie park met sy baie bome en groot grasperk is 'n gewilde agtergrond vir huweliksfoto's.

Tuin

In die tuin van 4½ha is nagenoeg 400 bome waarvan verskeie oor die 100 jaar oud is. Die klem in hierdie tuin lê op uitheemse, eksotiese bome. Kirstenbosch gee juis weer aandag aan die inheemse bome van ons land. Die vywers in die tuin is die bron van die Swartrivier.

Kampioenbome

In 2008 het die staatsdepartement belas met bosbou kampioenbome in Suid-Afrika begin identifiseer. Ses bome in hierdie tuin word sedertdien as uniek bestempel. Hulle is die volgende:

• Waarskynlik die grootste Aleppoden (Pinus halapensis) in die wêreld is hier te besigtig.
• Een van die grootste grootblaarvye, in Engels 'n Moreton Bay fig, en wetenskaplik bekend as die Ficus macrophylla, staan hier.
• 'n Kurkeik (Quercus suber)
• 'n Turkse eik, ook bekend as 'n moseik (Quercus cerris)
• Die Norfolkden, ook bekend as kamerden (Araucaria heterophylla of Araucaria excelsa) is nou 40 m hoog.
• Queensland Kauri (Agathis robusta).

Geskiedenis

Die Britse immigrant Ralph Henry Arderne (1802–1885) het in 1830 in Kaapstad aangekom en was in die middel van die eeu reeds 'n welvarende houtinvoerder. Skeepskapteins wat die Kaap aangedoen het, het aan Arderne boomplantjies gebring vanaf Australië, Chili, Indië, Libanon en Spanje. En op sy beurt het Arderne weer aan hulle Suid-Afrikaanse plantmateriaal verskaf. Arderne het die wêreldberoemde Engelse botaniese tuin Kew besoek en was goed bekend met die Engelse plantkundige James Bowie, 'n voormalige tuinier by Ludwigsburg. In 1845 koop Arderne 'n deel van die plaas Stellenberg, noem dit The Hill en lê sy tuin aan. Sy oudste seun, die Kaapstadse prokureur Henry M. Arderne, gaan na sy vader se oorlyde met die tuin voort. Na Henry se dood in 1914 word die The Hill in erwe verdeel en verkoop. Stad Kaapstad koop egter die kern van die tuin en sedert 1961 staan dit bekend as die Arderne-tuin. Vanaf 2004 is die tuin onder beheer van die Vriende van die Arderne-tuin.

Lees ook

• Ludwigsburg

Bibliografie

• Esterhuyse, Neels en Jutta von Breitenbach en Hermien Söhnge: Remarkable trees of South Africa. Kaapstad: Briza-publikasies, 2001. ISBN 978-1-875093-28-1
• Tredgold, Arderne: The Ardernes and their garden. A family chronicle. Kaapstad: Arderne Book Trust, 1990. ISBN 978-0-620-15371-3
• www.ardernegarden.co.za
• www.championtrees.co.za