Balju

'n Balju is 'n hofamptenaar wat verantwoordelik is vir die betekening van dokumente (waaronder dagvaardings, kennisgewings, lasbriewe en opdragte) en vir die uitvoering van uitsprake en bevele. 'n Balju verteenwoordig die siviele regstelsel en is nie betrokke by kriminele regspleging nie.

Die balju hoef egter nie dokumente persoonlik te beteken nie. Dit kan lei tot gevalle waar beslag op eiendom gelê word sonder dat die persoon die hofstukke ontvang het. Die onus is dus op die verbruiker om seker te maak van enige moontlike regsaksie as hy/sy vermoed daar kan dalk so 'n aksie teen hom kan wees.

In Suid-Afrika hou die Suid-Afrikaanse Baljuraad toesig oor die diens wat verskaf word. Balju's moet ten alle tye menslik optree en volgens die Gedragskode vir Balju's handel. Klagtes kan by die raad se hoofbestuurder aangemeld word.

Beslagleggings

Tydens beslagleggings kan 'n balju 'n perseel binnegaan, selfs as niemand daar is nie, en indien nodig 'n slotmaker ontbied om toegang te verkry. Hulle kan beslag lê op bates soos voertuie, meubels en ander eiendom en dit verwyder en verkoop om slegte skuld te delg. Hulle kan ook beslag op vaste eiendom lê en dit op 'n veiling verkoop.

Noodsaaklike items, soos kos en beddens, beddegoed en klere mag egter nie verwyder word nie. Hulle mag ook nie (onderhewig aan sekere riglyne) gereedskap verwyder wat gebruik word om 'n inkomste te verdien nie.