Bergse kraaier

Die Bergse kraaiers, ook bergkraaiers genoem, is die oudste bekende Duitse hoenderras, wat in die hertogdom Berg ontstaan het. Daar bestaan ook 'n bantamvariant van die ras. Tipies vir hierdie langkraairas is die lang melodieuse kraai van die hane, wat tot 15 sekondes kan duur.

Kopstudie van 'n haan

Die tipiese kraai

Hen

Kraaiwedstryd in Duitsland (2016)

Bantam

Geskiedenis

Volgens oorlewering was die voorvaders van die Bergse kraaier in die Middeleeue uit die Balkan na Duitsland gebring, waar hul familielede, die Bosniese kraaiers, ook tans geteel word. Hierdie teorie word ondersteun deur genetiese navorsing, wat die verwantskap tussen die Bergse kraaiers en die Suidoos-Europese hoenderrasse bevestig. Volgens 'n ander teorie lê die oorsprong van die Bergse kraaier by Spaanse hoenderrasse, wat deur Spaanse monnike ingevoer is. Bergse kraaiers wat deur Duitse immigrante na Brasilië ingevoer is, was later weer die voorouers van die Brasiliaanse kraaier, die "galo músico".

Eienskappe

Bergse kraaiers het 'n langgestrekte en hoë vorm met 'n enkele kam, wit oorlelle en leiblou pote. Tipies is die na bo gewelfde rug en die ietwat plat stert. Die tipiese veretekening, die sogenaamde Dobbelung, is die sterkste vorm van omsoming. Hierdie tekening kom slegs by die Bergse kraaier, die kruiper en die Bergse hangkam voor. Die enigste erkende kleurvariant is swart-goudbruin.

Teelt

Die skaarsheid van die ras het daartoe gelei dat die ras in die kategorie "hoogs bedreig" geplaas is. Die teel van die Bergse kraaiers in Duitsland, waar ongeveer 35 telers aktief is, word daarom deur die Vereinigung der Züchter Bergischer Hühnerrassen beheer. Verder word 'n stamboek in stand gehou om alle lewende Duitse Bergse kraaiers te registreer. Om die eienskappe van die ras te beskerm, word daar jaarliks 'n kraaiwedstryd in Duitsland georganiseer, waar die tydsduur van die kraaie bepalend is. In Nederland behoort die Bergse kraaier tot die rasse wat deur die Nederlandse speciaalclub voor Duitse Hoenderrassen geteel word. In Suid-Afrika word die ras ook deur die SASPO erken.

Eksterne skakels

• Wikimedia Commons het meer media in die kategorie Bergse kraaier.
• Webwerf van die Nederlandse speciaalclub voor Duitse hoenderrassen Geargiveer 6 Julie 2015 op Wayback Machine
• Webwerf van die Vereinigung der Züchter Bergischer Hühnerrassen und deren Zwerge – Kräherzüchtervereinigung seit 1884
• Voordrag oor die bekendstelling van 'n stamboek by die Initiative zur Erhaltung alter Geflügelrassen Geargiveer 28 Mei 2015 op Wayback Machine
• Artikel op 'n Duitse internetwerf vir langkraairasse^{[dooie skakel]}
• Webwerf van die SASPO met die ras se standaard