Bhairavi

Bhairavī (Sanskrit भैरवी) is 'n godin uit die Hindoemitologie. In 'n himne uit die 9de eeu, die Śāradā-tilaka word sy as volg geprys:

Die godin Bhairavi

Tripura-bhairavī se yantra

Jy is so subtiel dat gode jou nie kan beskryf nie. Jy is die wêreld se oorsprong en is sonder begin. Jy het drie oë, 'n pragtige gesig en vier hande waarin jy 'n boek en 'n rosekrans dra en waarmee jy gebare maak wat gerusstel en gunste verleen. Jy is die spraak se bron en van alles wat grasieus is asook van die heelal self. Jy dra die maan as 'n sikkel op jou bors en het 'n blank gelaatskleur soos die herfsmaan.

Haar naam Bhairavī is die vroulike vorm van Bhairava -die kwaai een- en sy word as die eggenote van hierdie kwaai vorm van Śiva beskou. Sy het egter 'n selfstandige rol wat baie aspekte vertoon en word as een van die Mahāvidyās beskou. Sy kan seksuele opwinding veroorsaak en selfs hemelse wesens raak bedwelm as hulle haar vereer, maar sy onderrig ook om deur yoga passies te bedwing en skep die Vedas.

Een van haar aspekte is Tripura-bhairavī, die kwaai een wat altyd probeer om die drie wêrelde (tripura) te vernietig. Vernietiging en skepping is die twee basisaspekte van die heelal wat mekaar voortdurend afwissel. Woede, jaloesie en ander selfsugitige gedrag versterk haar teenwoordigheid, terwyl regverdige gedrag dit verswak.

Maar sy het baie ander aspekte. As Sampatpradā-bhairavī gee sy rykdom en as Annapūrn̥eśvarī-bhairavī verleen sy kos. As Sakalasiddhi-bhairavī verleen sy volmaaktheid. Bhayavidhvam̊sinī-bhairavī vernietig alle angs. Caitanya-bhairavī verleen wakker bewussyn. Bhuvaneśvarī-bhairavī is teenwoordig by skepping en groei. Kāmeśvarī-bhairavī ontsteek seksuele lus en verleen bevrediging.