Bishopsgate-bomontploffing

Die Bishopsgate-bomontploffing was 'n aanval wat die Provisionele Ierse Republikeinse Leër (Provisional Irish Republican Army, IRA) op Saterdag, 24 April 1993 in Bishopsgate, een van die groot verkeersare in Londen se finansiële distrik, die City of London, geloods het. Die ontploffing, waarin 'n nuusfotograaf dood en 44 mense beseer is, is deur 'n vragmotor vol plofstof veroorsaak en het skade ter waarde van £350 miljoen berokken.

Wormwood Street, geleë op die hoek van Bishopsgate, op 'n rustige Sondagnamiddag. Die geboue op die foto is deur die bomontploffing ernstig beskadig

Een van die kontrolepunte wat ná die Bishopsgate-ontploffing in die City ingerig is (die foto wys die kontrolepunt tussen Moorgate-stasie en South Place)

Die terreuraanval op Bishopsgate is net sowat een jaar ná 'n soortgelyke ontploffing naby die Baltic Exchange geloods. Vervolgens is 'n sogenaamde "staalring" (met straatversperrings, kontrolepunte en CCTV-kamera's) geïmplementeer om die City of London te beskerm. Baie ondernemings het noodplanne vir toekomstige aanvalle of rampe begin opstel.