Bloemfonteinse Stadskouburg
Die Bloemfonteinse Stadskouburg is ’n teater in Markgraaffstraat, Bloemfontein.
| Stad of dorp | Bloemfontein | |
| Land | Suid-Afrika | |
| Sitplekke | 464 | |
| Geopen | 15 April 1959 | |
Geskiedenis wysig
Dit is op 15 April 1959 ingewy as een van die eerste formele stadskouburge in die land. Die eerste opvoering was Hellersee deur W.A. de Klerk.[1] Die Bloemfonteinse Teatergroep en Bloemfontein Repertory Society het die teater met sy 464 sitplekke gebruik vir ballet, opera en toneel. Dit het later die eerste tuiste van Sukovs geword.
Van die talle opvoerings in die Stadskouburg was Frank Staff se balletproduksie van N.P. van Wyk Louw se Raka, die Nasionale Toneelgeselskap se The Prisoner met André Huguenet in sy laaste rol in 1961, Moeder Courage met Anna Neethling-Pohl in 1973 en N.P. van Wyk Louw se omstrede Die Pluimsaad Waai Vêr in 1966[2] waarvoor Van Wyk Louw deur die destydse eerste minister, dr. Hendrik Verwoerd, aangeval is.[3] Hoewel Sukovs later na die Sand du Plessis-teaterkompleks getrek het, is die Stadskouburg steeds gebruik, veral deur toer- en amateurgeselskappe.
Die gebou het die afgelope tyd verwaarloos geraak.[4]
Verwysings wysig
- ↑ Jules Venter leef vir gimnastiek, Volksblad, 23 Maart 2012[dooie skakel] URL besoek op 5 Maart 2013
- ↑ The Encyclopaedia of South African Theatre, Film, Media and Performance URL besoek op 5 Maart 2013
- ↑ The Presidency Geargiveer 5 Maart 2016 op Wayback Machine (pdf) URL besoek op 5 Maart 2013
- ↑ Onderskrif, Volksblad, 24 Januarie 2013 URL besoek op 5 Maart 2013