Albert DeSalvo

Albert Henry DeSalvo (3 September 1931 – 25 November 1973) was ’n misdadiger in Boston, Massachusetts, wat beken het hy is die Boston Strangler, die moordenaar van 13 vroue in die Boston-gebied. DeSalvo is egter nie tronkstraf vir die moorde opgelê nie, maar vir ’n reeks verkragtings. Sy moordbekentenis word betwis en daar is steeds twyfel oor watter misdade DeSalvo werklik gepleeg het.

Albert DeSalvo
DeSalvo nadat hy in 1967 ontsnap en weer in hegtenis geneem is.
Gebore	(1931-09-03)3 September 1931
Oorlede	25 November 1973 (op 42)
Rede vir dood	Vermoor
Land	VSA
Bynaam	The Boston Strangler The Measuring Man The Green Man
Misdaadbesonderhede
Plek	Massachusetts
Datum(s)	14 Junie 1962 – 4 Januarie 1964
Slagoffers	13 (betwis)
Vonnisbesonderhede
Aangekeer	27 Oktober 1964
Vonnis	Lewenslange tronkstraf

Strangler-moorde

Tussen 14 Junie 1962 en 4 Januarie 1964 is 13 ongetroude vroue tussen die ouderdomme van 19 en 85 in die Boston-gebied vermoor; hul moorde is eindelik verbind met die Boston Strangler. Die meeste van die vroue is in hul woonstelle seksueel aangerand en daarna met klere verwurg. Die oudste slagoffer is aan ’n hartaanval dood. Nog twee, waarvan een erg geslaan is, is doodgesteek. Daar was geen teken van gedwonge toegang nie en dit lyk of die vroue die moordenaar óf geken het óf hom vrywillig in hul blyplekke toegelaat het. Die polisie was nie oortuig daarvan dat al die moorde deur een persoon gepleeg is nie, veral vanweë die groot verskil in hul ouderdomme. Aan die ander kant het ’n groot deel van die publiek geredelik aanvaar een persoon het al die misdade gepleeg.

Gainsborough Street, waar die eerste van die Boston Strangler se moorde gepleg is.

In die Amerikaanse herfs van 1964 was die polisie besig om, benewens die Strangler-moorde, ook ’n reeks verkragtings te ondersoek deur ’n man wat die "Measuring Man" of "Green Man" gedoop is. Op 27 Oktober 1964 het ’n vreemdeling ’n jong vrou se woonstel in Oos-Cambridge binnegedring deur voor te gee hy is ’n speurder. Hy het haar aan die bed vasgebind en haar seksueel aangerand. Hy het skielik opgestaan, gesê hy is jammer en die woonstel verlaat. Die vrou se beskrywing van haar aanvaller het daartoe gelei dat die polisie DeSalvo as die aanvaller geïdentifiseer het. Toe sy foto gepubliseer word, het baie vroue hom as hul aanvaller geëien.

Nadat DeSalvo van verkragting aangekla is, het hy ’n bekentenis gedoen dat hy die Boston Strangler is – onder hipnose en daarsonder. Hoewel ’n paar feite nie ooreengestem het nie, kon DeSalvo besonderhede oor die moorde verskaf wat nie openbaar gemaak is nie. Daar was egter geen fisieke bewyse om sy bekentenis te steun nie. Hy is dus net vir vroeëre, onverwante voorvalle van diefstal en verkragting verhoor.

Tronkstraf en dood

DeSalvo is in 1967 tot lewenslange tronkstraf gevonnis. In Februarie van dié jaar het hy en twee medegevangenes uit die Bridgewater-staatshospitaal ontsnap. In ’n nota op sy bed wat aan die superintendent gerig was, het DeSalvo gesê hy wil met die ontsnapping aandag vestig op die toestande in die hospitaal en sy eie situasie. Die dag ná die ontsnapping het hy hom aan sy regsverteenwoordiger oorgegee.

Hy is daarna oorgeplaas na die maksimumsekuriteitsgevangenis wat in dié tyd as Walpole bekend was, waar hy later sy Strangler-bekentenis teruggetrek het. Op 25 November 1973 is sy lyk gevind nadat iemand hom doodgesteek het. ’n Medegevangene, Robert Wilson, is van sy moord aangekla, maar nadat die jurie ’n dooie punt bereik het, is niemand weer van die moord aangekla nie.

Omstredenheid

Daar bestaan steeds twyfel of DeSalvo inderdaad die Boston Strangler was of nie. Toe hy die bekentenis gedoen het, het mense wat hom persoonlik geken het, nie geglo hy sou die moorde kon pleeg nie. Daar was ook groot verskille in die vroue wat vermoor is se ouderdomme en in die modi operandi van die verskillende moorde.

Susan Kelly is een skrywer wat glo die moorde is deur verskillende mense gepleeg. Nog ’n skrywer, die FBI-profielopsteller Robert Ressler, sê dit is ondenkbaar dat een mens al die moorde kon gepleeg het vanweë die verskillende gedragspatrone.

In 2000 het Elaine Whitfield Sharp, ’n regsgeleerde wat in forensiese gevalle spesialiseer, begin om die families van beide DeSalvo en Mary A. Sullivan – een van die laaste slagoffers – te verteenwoordig om DeSalvo se naam skoon te kry en Sullivan se ware moordenaar op te spoor. Sharp het op verskeie teenstrydighede afgekom wat gelei het tot verdere twyfel oor DeSalvo se bekentenis, soos verskille in die volgorde van gebeure, tye waarop die moorde gepleeg is, ens. Sharp werk steeds vir die DeSalvo-familie aan die saak.

Eksterne skakels

• Albert DeSalvo – The Boston Strangler?
• "Boston Strangler", Encyclopaedia Britannica
• Die Boston Strangler Geargiveer 27 Oktober 2006 op Wayback Machine