Bristol Bulldog

Die Bristol Bulldog was 'n enkelsitplek, dubbeldekker vegvliegtuig wat deur die Britse Lugmag gebruik is tussen die twee Wêreldoorloë. Hierdie vliegtuig was ontwikkel na aanleiding van 'n spesifikasie van die Britse Lugministrie wat 'n enkelsitplek dag-en-nag vegter met twee Vickers-masjiengewere gespesifiseer het. Die Merk I was gebou vir ontwikkeling en Merk II het die Armstrong Whitworth Siskin's en Gloster Gamecock's vervang. Die eerste Bulldogs is in Junie 1929 aan 3 Eskader te Upavon toegedeel.

Bristol Bulldog
Tipe	Vegvliegtuig
Vervaardiger	Bristol Aeroplane Company
Ontwerp deur	Frank Barnwell
Nooiensvlug	17 Mei 1927
Bekendstelling	1929
Onttrek	1937
Status	Onttrek
Hoofgebruikers	Britse Lugmag Koninklike Australiese Lugmag Finse Lugmag
Aantal gebou	443

Die hele raamwerk was van metaal wat met 'n styfgespande doekstof oorgetrek is. Die stertwiel het 'n skokbreker gehad, daar was suurstof vir die vlieënier asook 'n kortgolftweerigtingradio. 'n Tweesitplek-opleidingsvliegtuig is ook gebou.

Teen 1932 was 10 Eskaders toegerus met die Bulldog en was dit die standaard vegvliegtuig tot in 1936. Die 312 vliegtuie in gebruik was op daardie stadium sowat 70% van Brittanje se lugverdedigingsvermoë. Die laaste Bulldog is in 1937 uit diens onttrek en vervang met die Gloster Gauntlet.

Baie van hierdie vliegtuie is na Australië, Denemarke, die destydse Siam, Swede, Estonië en Finland uitgevoer.

Tegniese besonderhede

Besonderhede van die Bristol Bulldog II:

Item	Statistiek
Aantal motore	1
Tipe motor	Skroef
Vervaardiger	Bristol Jupiter stermotor
Kraglewering per motor	440 perdekrag
Vlerkspan	10,34 m
Lengte	7,62 m
Hoogte	3,0 m
Vlerkoppervlakte	28,47 m2
Maks. opstygmassa	1 583 kg
Maks. snelheid	280 km/h
Operasionele hoogte	8 230 m
Togafstand	443 km
Klimvermoë	6 096 m in 14½ minute
Bewapening	Twee gesinchroniseerde Vickers-masjiengewere voor.

Sien ook

• Lys van vegvliegtuie

Bron

• Crosby, Francis: THE WORLD ENCYCLOPEDIA OF FIGHTERS & BOMBERS. 2015. ISBN 978-1-84476-917-9