Chalkidiese helm

Die Chalkidiese helm is 'n tipe helm wat gebruik is in Antieke Griekeland. Die helm was veral gewild in die vyfde en vierde eeu voor Christus.

Terminologie

Die helm staan bekend as die Chalkidiese helm omdat daar aanvanklik na aanleiding van uitbeeldings op erdewerk gedink is dat dit gemaak is in die Euboïse stad Chalkis. In werklikheid is dit nie bekend of die helm wel afkomstig is uit Chalkis nie; dit is selfs nie eens seker dat die tersaaklike erdewerk Chalkidisies is nie.

Beskrywing

Die Chalkidiese helm het ontwikkel uit die Korintiese helm en word gekenmerk deur 'n opening vir die ore-hiermee is 'n nadeel van die Korintiese helm verwyder-en 'n breër opening vir die mond.

Onder die helm is beskerming vir die wang en nek. Aan die voorkant, tussen die wangbeskerming, is 'n plaat wat die neus beskerm. In Italië is die tipe met vaste wangbeskermers Chalkidies genoem, en die tipe met los wangbeskermers Lucanies, omrede dit baie in Lucanië gebruik is.

Gebruik

Teen die tyd van Alexander die Grote is die helm nog steeds deur swaargewapende soldate, veral Hopliete ('n uitsondering hierop was die Spartane, wat die pyloshelm gedra het, wat baie makliker was om te maak), gedra. Macedoniese soldate het waarskynlik ook Chalkidiese helms gedra. Daar word vermoed dat die helm op sy beurt aanleiding gegee het tot die Attiese helm.

Sien ook

• Attiese helm
• Korintiese helm
• Thraciese helm
• Pylos (helm)

Verwysings

• art. Helmets, in The Panoply of the Greek Hoplite, classics.und.ac.za, 2000.

Hierdie artikel is in sy geheel of gedeeltelik vanuit die Nederlandse Wikipedia vertaal.