Chinese liguster
Die orde van die ligusters (Oleales of Ligustrales) is plantorde uit die verouderde Wettstein-stelsel wat nie meer in gebruik is nie.
Die orde bevat slegs een familie, die Olyfagtiges (Oleaceae), wat bome en struike insluit. Die tweeslagtige blomme is in trosvormige bloeiwyses gerangskik. Behalwe die olyf, waarna die familie en die orde genoem is, behoort sierplante soos die sering en die Chinese klokkie ook tot hierdie plantgroep.
Die olyf is een van die belangrikste landbougewasse in die Middellandse See gebied. Ligusters (orde Ligustrales of Oleales) is houtagtige plante met blare wat of in kranse, of teenoorstaande gerangskik is; die blomme is tweeslagtig en kom selde alleen voor, maar is meestal in een bloei wyse gerangskik. Die Ligustrum-genus (Engels: privet) sluit 50 spesies in en kan immergroen of bladwisselend wees. Die struike is baie gehard en kan droogtes en strawwe ryp goed weerstaan. Die blomme is meestal wit tot dofgeel en kom oorvloedig in die lente voor, gevolg deur klein donkerblou tot swart bessies.
Ligusters is pragtige sierstruike, veral die met gekleurde en bont blare. Sommige spesies word egter hoofsaaklik as heinings aangeplant. Ligusters groei in feitlik enige soort grond. Baie spesies het 'n netagtige wortelstelsel, wat die omliggende grond geweldig kan uitput sodat ander plante moeilik in hul nabyheid groei. Saad sowel as hardehoutsteggies kan vir voortplanting gebruik word en die beste variëteite kan ook op die onderstamme van ooreenstemmende spesies geokuleer of oorgeënt word. So lyk ligusters voortreflik as hoogstamboompies. Ligustrum lucidum of Chinese liguster is een van die bekendste boompies in Suid-Afrika. Dit word nie alleen as heiningplant, struik of stamboompie aangeplant nie, maar ook as kleinerige koelteboom. Die plant aard feitlik oral.
Dit word sowat 5 tot 9 m hoog en die kruin is piramidevormig, hoewel die meeste as hoogstamme met ronde kruine voorkom (meestal so gesnoei). Die welriekende wit blomme word gevolg deur blink, swartblou bessies. Ligustrum lucidum tricolor is besonder mooi, want die nuwe blare is oneweredig met pienk omsoom. Later verkleur dit egter tot roomwit.
Bronne
wysig- Wêreldspektrum, 1982, ISBN 0908409583 band