'n Commissaire (Frans vir kommissaris) in kompeterende fietsry, is 'n beampte wat diens doen as 'n skeidsregter. Die commissaire is in beheer van die fietswedren en het die mag om onder andere wedrenne te kanselleer, afstande te verkort en roetes te verander indien dit nie aan die vereistes voldoen nie.

Commissaires in aksie tydens 'n fietswedren.

Die commissaire moet neutraal en onpartydig wees. Hy moet toesien dat die wedren regverdig en veilig geskied.

UCI Internasionale Commissaires wysig

Slegs commissaires wat die UCI-eksamen geslaag het mag die titel “UCI Internasionale Commissaire” gebruik. Alle commissaires moet deur hul Nasionale Federasie gelisensieer wees. Voornemende UCI-commissaires moet ten minste vir twee jaar op nasionale vlak as commissaire diens doen alvorens hul deur hul Nasionale Federasie aanbeveel mag word vir die UCI-eksamen. Dit word van 'n commissaire vereis om al die regulasies van die UCI te ken.

Die UCI stel commissaires aan vir al hulle internasionale byeenkomste. Die aangestelde commissaire is die President van die commissaire-paneel tydens 'n UCI-wedren. Die Nasionale Federasie verskaf die res van die paneel. Die UCI-commissaires word vergoed vir hul dienste en moet die amptelike UCI-drag dra.

Funksies van 'n Commissaire wysig

Die funksies van 'n commissaire kan in drie verdeel word.

  • Voor die wedren begin, moet hulle met die organiseerder skakel om die byeenkoms se skedule en tegniese aspekte ten opsigte van die lisensies na te gaan. Hulle kan ook die organiseerder van raad voorsien. Hulle moet ook vergaderings reël; eerstens met die organiseerder en spanbestuurders en tweedens met die commissaire-paneel om spesifieke sake omtrent die wedren te bespreek.
  • Tydens die byeenkoms verseker hulle die gladde verloop van die wedren en dat die UCI-reëls nagekom word. Hulle moet blitsig kan optree indien enige onverwagte situasie mag opduik.
  • Na die wedren vergader al die betrokke commissaires en elkeen doen verslag oor sy aspekte van die wedren. Dan reël die President van die commissaire-paneel 'n vergadering met die organiseerder waar 'n totale oorsig van die wedren gelewer word, positief sowel as negatief. Laastens skryf die President sy verslag aan die UCI. Hierdie verslag is baie belangrik omrede dit die enigste amptelike verwysing na die wedren is, dus is die objektiwiteit van die commissaire deurslaggewend.[1][2][3]

Verwysings wysig

  1. UCI Regulations - Part 1: General Organisation of Cycling as a Sport
  2. The UCI International Commissaire - An expert Serving Cycling
  3. Practical Guide for Commissaires in mountain bike events.