Dáil Éireann

Die Dáil Éireann [dɔɪl_ˈɛərən] is die laerhuis en hoofkamer van die Oireachtas, die wetgewende gesag in die Republiek van Ierland wat ook die President van Ierland en die hoërhuis of Seanad Éireann insluit. Die laerhuis word ten minste elke vyf jaar volgens 'n stelsel van proporsionele verteenwoordiging en deur middel van 'n eenvoudige oordraagbare stem verkies. Sy bevoegdhede kom grootliks ooreen met dié van ander parlementêre regeringstelsels met tweekamerparlemente, en dit is by verre die oorheersende tak van die Oireachtas.

Leinster House, die setel van die Dáil Éireann in Dublin

Die vergadersaal van die Ierse laerhuis

Behalwe vir die beperkings soos deur die Grondwet van Ierland bepaal is die laerhuis bevoeg om enige wet na goeddunke af te kondig en die Taoiseach as regeringshoof te benoem en uit sy of haar amp te verwyder. Die Dáil Éireann vergader sedert 1922 in Leinster House in Dublin.