DuckDuckGo

DuckDuckGo
Tipe webblad	Soekenjin
Taal(e)	Veeltalig, o.a. Afrikaans
Registrasie	Geen
Eienaar	DuckDuckGo, Inc.
Outeur	Gabriel Weinberg
Opgerig	25 September 2008
Huidige status	Aktief
URL	www.duckduckgo.com

DuckDuckGo is ’n soekenjin op die Internet. Een van hulle grootste trekpleisters is dat hulle meer privaatheidsbewus is en nie op gebruikers spioeneer nie. Die gebruiker se gedrag en profiel beïnvloed dus nie die resultate nie. As gevolg hiervan sal elke gebruiker presies dieselfde resultate vir dieselfde soektog kry.

Die soekenjin is deur Gabriel Weinberg, ’n nagraadse entrepreneur van MIT, gestig en befonds. Die maatskappy het 21 werknemers en hulle hoofkantoor is in Paoli, Pennsilvanië in die Verenigde State van Amerika geleë. Hulle naam is van die kinderspeletjie, “Duck, duck, goose”, afgelei.

DuckDuckGo het ’n innoverende manier om ander soekenjins te integreer. Dit word gedoen met die sogenaamde “bang syntax” (knalsintaks), wat beteken dat ’n mens ’n uitroepteken tesame met ’n sleutelwoord gebruik om soektogte met ander soekenjins uit te voer.

Afrikaanse Wikipedia

DuckDuckGo kan gebruik word om vir resultate in die Afrikaanse Wikipedia te soek. 'n Soektog met "!afwiki" as voorvoegsel sal resultate tot die Afrikaanse wiki beperk. M.a.w, as mens in duckduckgo.com vir "!afwiki gesegdes" soek, verskyn die Afrikaanse wiki se soekresultate daarvoor.

Eksterne skakels

• Wikimedia Commons het meer media in die kategorie DuckDuckGo.
• (en) Amptelike webtuiste