Dupleks vlekvrye staal

Dupleks vlekvrye stale het 'n gemengde struktuur van kubies-ruimtegesentreerde ferriet en kubies-vlakgesentreerde austeniet. Die presiese hoeveelheid van elke fase word bepaal deur die samestelling en hittebehandeling. Die meeste legerings is ontwerp om ongeveer gelyke hoeveelhede van elke fase te bevat in die uitgegloeide toestand. Die hoof-legeringselemente is chroom en nikkel. Stikstof, molibdeen, koper, silikon en wolfram kan bygevoeg word om die strukturele balans te beheer en om sekere korrosieweerstand-eienskappe te verkry. Die korrosieweerstand van dupleks vlekvrye stale kom ooreen met dié van die austenitiese vlekvrye stale met vergelykbare legeringsinhoud, maar dupleks vlekvrye stale het hoër treksterktes en vloeigrense en het ook beter weerstand teen spanningskorrosiekraking. Die taaiheid van dupleks vlekvrye stale lê tussen dié van ferritiese vlekvrye stale en austenitiese vlekvrye stale.

'n Gietblok van 2507 Dupleks vlekvrye staal

Die voordele wat dupleks vlekvrye stale bied bo die konvensionele 300-reeks vlekvrye stale is sterktes ongeveer twee keer van dié van austenitiese stale, weerstand teen spanningskorrosie-kraking en putkorrosie. Hierdie materiale kan gebruik word in die temperatuurstrek van -60 tot 300°C.

Die hoë vloeigrens van dupleks vlekvrye stale bied ontwerpingenieurs die moontlikheid om dunner wanddikte materiaal te gebruik met voldoende druk- en lasdraende kapasiteit, wat lei tot laer massas en korter sweistyd. Die vloeigrens van 22Cr 5.5Ni 3Mo 0.15N grade is ten minste 450 MPa, wat twee keer hoër is as die vloeigrens van austenitiese vlekvye stale en aanmerklik hoër as dié van ferritiese vlekvrye stale.

Dupleks vlekvrye stale word in ‘n wye reeks industrieë gebruik, veral olie en gas, pulp en papier, hitteruilers en drukvate, in brugkonstruksie en ontsoutings- en waterbehandelingsaanlegte. Hulle word gereeld aanbeveel vir vervangings waar austenitiese vlekvrye stale gefaal het as gevolg van chloried-spanningskorrosie-kraking of ander korrosieprobleme.