Elektra Records

Elektra was 'n platemaatskappy wat in 1950n deur Jac Holzman in New York opgerig is. Hy is tot hierdie stap geïnspireer nadat hy 'n optrede van Georgianna Banister bygewoon het. Hy het besluit om die musiek self uit te gee en 1951 het 150 eksemplare van New Songs by John Gruen verskyn: 100 eksemplare vir verkope en 50 vir promosiedoeleindes. Ná enkele maande het Elektra sy eerste terugslag as beginnende platemaatskappy beleef: die verspreider het die vyftig gratis eksemplare verloor. Die ander 100 is aan Holzman terugbesorg.

Holzam het later besluit om 'n platewinkel vir meestal folkmusiek te open. Die winkel is gereeld deur folkliefhebbers uit die buurt besoek en so het Holzman in kontak gekom met folksangeres Jean Ritchie. Die resultaat was Elektra se tweede albumuitgawe: Jean Ritchie Singing the Traditional Songs of Her Kentucky Mountain Family. Daar is net enkele honderde eksemplare van verkoop, maar die LP is goed ontvang. Elektra het geblyk om op die regte pad te wees en gevolglik het Holzman besluit om sy eie opnameapparatuur aan te skaf.

Elektra het geleidelik gegroei en veral op folk en blues gefokus. In die begin van die 1960's het 'n belangrike deurbraak vir Elektra voorgekom toe Holzman Judy Collins kontrakteer. Die sake hetdaarna só goed verloop dat Holzman die produksie aan Mark Abramson en later Paul Rothchil oorgelaat het. Elektra het toe op die vervaardiging van popkunstenaars begin fokus, meestal om kommersiële redes. 'n Eerste kontrak met The Lovin' Spoonful het deur die mat geval, maar Elektra het wel daarin geslaag om die groep Love binne te haal. In Mei 1966 het Holzman die Whiskey A Go-Go in Los Angeles besoek om Love daar te sien optree. As openingshandeling het 'n toe nog onbekende groep opgetree waar Holzman self ook nog nooi van gehoor het nie, maar wat later een van die mees legendariese groepe op die poptoneel sou word: The Doors. Ná aarselinge met Rothchild is The Doors gekontrakteer.

Van toe af het die sake vir Elektra uitstekend gegaan, maar Holzman het besef dat sy platemaatskappy te klein was om selfstandig voort te bestaan. In 1967 het hy Elektra vir VS$10 miljoen aan Warner Brothers verkoop, al het Elektra as onderdeel van Warner Brothers voortgegaan om sy eie keuses te maak en beslissings te neem. So het Elektra in die 1970's besluit om hul meer op country, rock en funk te rig. Holzman was toe reeds nie meer betrokke nie: hy het in 1973 met pensioen gegaan.

In Februarie 2004 het Warner Music Group Elektra en Atlantic Records versmelt. Sedertdien word albums onder die logo van Atlantic Records gepubliseer.