Enjinbeheereenheid

'n Enjinbeheereenheid is 'n elektroniese beheereenheid wat verskeie aspekte van 'n binnebrandenjin se werking beheer. Die eenvoudigste eenhede beheer slegs die hoeveelheid brandstof wat by elke silinder van die enjinsiklus ingespuit word. Meer gevorderde beheereenhede op moderne motors beheer ook die ontstekingstydreëling, kleptydreëling die hoeveelheid druk wat deur die turboaanjaer gelewer word asook ander bybehore.

Binnekant van 'n Golf TDI se enjinbeheerstelsel.

Enjinbeheereenhede bepaal die hoeveelheid brandstof, kleptydreëling en ander parameters deur die enjin te monitor aan die hand van verskeie sensors. Hierdie sensors kan die verdeelpypdruksensor, die versnellerposisiesensor, die lugtemperatuursensor, suurstofsensor en vele ander insluit. Hierdie sensors maak dan deel uit van 'n beheerlus (soos 'n PID-beheerder).

Voor die bekendstelling van enjinbeheereenhede was die meeste enjinparameters vasgestel gewees. Die hoeveelheid brandstof per silinder per enjinsiklus was bepaal deur 'n vergasser of brandstofinspuitpomp.