Europese Beleggingsbank
Die Europese Beleggingsbank (EIB) is 'n instelling van die Europese Unie.[1]
Organisasie
wysig
Dit is reeds in 1958 gestig en sedert 1968 is dit in Luxemburg gevestig.[2] In 2024 is sy president Nadia Calviño. Die bank is die gesamentlike besit van die 27 lidlande van die Europese Unie.[1]
Die bank het 'n raad van goewerneurs wat bestaan uit die ministers (van finansies) van die lidlande. Hulle definieer die algemene uitleenbeleid. Die raad van goewerneurs keur uitleen- en leenaktiwiteite goed. Dit bestaan uit 28 lede; een elk deur die lidlande aangestel, plus een wat deur die Europese Kommissie aangestel word. Dit word gelei deur die EIB-president. 'n Bestuurskomitee hanteer die dag-tot-dag aktiwiteite as die uitvoerende liggaam. Daar is 'n ouditkomitee wat seker maak dat alle bedrywighede behoorlik uitgevoer word.[1]
Die EIB het in 2019 63,3 miljard euro belê en werk sedert die 1960's in 135 nie-EU-lande. Dit het meer as 3450 werknemers, die meeste van hulle in Luxemburg, maar daar is ook kantore elders.[2]
Die streekspilpunt vir Suider-Arika en die Indiese Oseaan is in Pretoria gevestig.[3][4]
Doelwitte
wysigDie doelwitte van die bank is om Europa se potensiaal in terme van werksgeleenthede en ekonomiese groei te bevorder, om aksie te ondersteun wat klimaatsverandering versag en ook wat EU-beleid buite die EU bevorder.[1]
Aktiwiteite
wysigDie EIB leen geld op die internasionale kapitaalmarkte en leen dit uit aan partye wat projekte wil aanpak wat in lyn is met die doelstellings van die EU. Dit doen dit op gunstige voorwaardes. Sowat 90% van sulke lenings word binne die EU uitgegee, maar 10% gaan na aktiwiteite buite die Unie. Niks van die geld kom uit die begroting van die Unie self nie. Sowat 90% van die lenings word aan kliënte van alle groottes toegeken wat ekonomiese groei en groter indiensneming ondersteun. Maar dikwels trek sulke beleggings ook die aandag van ander beleggers en projekte sal dikwels EIB-finansiering kombineer met geld uit ander bronne. Daarbenewens bied die bank advies en tegniese bystand aan sy kliënte wat waarde vir geld verder maksimeer. Lenings bo 25 miljoen euro kan direk verskaf word, maar daar word ook indirek kleiner bedrae verskaf deur kredietlyne oop te maak vir finansiële instellings wat fondse aan krediteure uitleen.[1]
Klimaataksie
wysigIn 2019 is deur die raad van goewerneurs 'n nuwe stel ambisieuse teikens vir klimaatsaksie en omgewingsvolhoubaarheid goedgekeur. Die EIB-groep beplan om een biljoen euro in die kritieke dekade tussen 2021 en 2030 te belê. Dit beplan ook om sy finansiering van sulke projekte te verhoog totdat dit in 2025 50% van sy bedrywighede oorskry. Al sy aktiwiteite is in 2020 in ooreenstemming gebring met die doelwitte van die Parys-klimaatooreenkoms.[5]
Verwysings
wysig- ↑ 1,0 1,1 1,2 1,3 1,4 "European Investment Bank (EIB)". Europese Unie.
- ↑ 2,0 2,1 "Chronology of the EIB". EIB.
- ↑ "EIB Regional Hub for Southern Africa and the Indian Ocean". EIB.
- ↑ "European Ivestment Bank". Suid-Afrikaanse regering.
- ↑ "Climate Bank Roadmap". EIB.