F.I.J. van Rensburg
Francois Izak Janse van Rensburg (1922 - 2015) was 'n akademikus en literêre kritikus. Van Rensburg was aanvanklik dosent aan die Universiteit van die Oranje-Vrystaat, waarna hy hoogleraar en hoof van die departement Afrikaans en Nederlands aan die Randse Afrikaanse Universiteit geword het. Hy het 'n reeks literêre artikels en opstelle gepubliseer.
F.I.J. van Rensburg | |
|---|---|
| Gebore | Francois Izak Janse van Rensburg 18 Januarie 1922 |
| Sterf | 10 Januarie 2015 |
| Nasionaliteit |  Suid-Afrika |
| Alma mater | Universiteit van die Oranje-Vrystaat, Randse Afrikaanse Universiteit |
| Beroep | Akademikus en literêre kritikus |
| Bekend vir | Oor skrywers en boeke (1982) Oopgelate kring (1982) |
Agtien van sy populêr letterkundige opstelle wat van 1961 tot 1962 in Die Taalgenoot verskyn het, is gebundel in Die smal baan (1963). Sy doktorale proefskrif, Skering en inslag: 'n stilistiese analise van "Ballade van die bose", is in 1969 gepubliseer. In 1963 het hy ook ’n monografie oor die skrywer Uys Krige geskryf.
Van Rensburg het heelparty kritiese opstelle in die letterkundige tydskrif Standpunte gepubliseer. In 1975 het hy twee boeke oor N.P. van Wyk Louw se werk met die titels Sublieme ambag en Swewende ewewig gepubliseer. In letterkundige kringe is Van Rensburg bekend vir sy lang polemiek met die akademikus, literêre kritikus en skrywer Hendrik van der Merwe Scholtz oor beginsels in die literêre kritiek soos Scholtz en Hellinga dit in Kreatiewe analise van taalgebruik (1955) uiteengesit het.
Onder Van Rensburg se redaksie het ook Oor skrywers en boeke (1982) en Oopgelate kring (1982) verskyn.
Bronnelys
wysig- Wêreldspektrum, 1982, ISBN 0-908409-69-9, volume 28, bl. 21, 22