Frances le Roux

Frances le Roux is ’n Afrikaanse skrywer en digter. Sy is ook ’n praktiserende fisioterapeut wat haar doktorsgraad verwerf in die gebruik van musiek vir fisiese heling en verskeie artikels in vakkundige tydskrifte oor hierdie onderwerp skryf.

Lewe en werk

Frances Hendriehetta le Roux word groot op Wellington, waar sy in 1973 aan die Hugenote Hoërskool matrikuleer. Sy bekwaam haar daarna aan die Universiteit van Stellenbosch as fisioterapeut, waar sy in 1977 die B.Sc.-graad in Fisioterapie behaal. In die tydperk tussen 1977 en 1989 werk sy in verskeie hospitale in Kaapstad soos Victoria Hospitaal in Wynberg vir drie maande, Lady Michaelis Hospitaal in Plumstead vir twee jaar, Princess Alice Hospitaal in Retreat vir nege maande en Valsbaai Hospitaal in Vishoek vir ’n jaa In hierdie tyd is sy vanaf 1980 deeltyds betrokke in ’n private praktyk, maar open dan haar voltydse praktyk in fisioterapie in 1989 in Vishoek naby Kaapstad. Haar belangstelling in musiek en die kunste lei tot ’n M.Sc.-graad oor musiekterapie, wat sy in 1999 aan die Universiteit van die Wes-Kaap behaal met ’n tesis oor “Die effek van largo-tempo musiek op pyn tydens fisioterapeutiese behandeling van werwelkolom patologie”. In April 2005 behaal sy ook haar Ph.D.-graad aan die Universiteit van Stellenbosch oor hierdie onderwerp met ’n proefskrif getitel “Die effek van musiek op die immuunsisteem, emosies en longfunksie tydens die standaard fisioterapeutiese behandeling van spesifieke longpatologie”. In die tussentyd woon sy ook verskeie kursusse in Suid-Afrika en Duitsland by om haar verder te bekwaam vir haar professie, insluitende in Junie 2003 die International Music/Medicine Symposium in Hamburg in Duitsland. Self bied sy ook verskeie werkswinkels aan. Sy is ’n lid van die International Society of Music in Medicine en skryf verskeie artikels oor hierdie onderwerp wat in akademiese tydskrifte verskyn, onder andere in Natural medicine, Hands on, Physio Forum, Journal of Music Therapy en South African Journal of Physiotherapy. Ander professionele verenigings waaraan sy behoort sluit in die South African Society of Physiotherapy, Private Practice Associates, Orthopaedic Manipulative Therapists Group, Pain Management Society of South Africa en Women’s Health Society. Sy behoort ook aan die Kirstenbosch Botaniese Vereniging en musiek en plantkundige verenigings in Vishoek. Sy woon in Glencairn naby Simonstad.

Skryfwerk

“Maria” en “Herskep” is digbundels. “Rut” is die lewensverhaal van hierdie Bybelkarakter, wat as vreemdeling saam met haar skoonmoeder na Israel gekom het en eindelik in Jesus se bloedlyn opgeneem is. Die verhaal word aangebied as ek-vertelling. Haar debuutroman “Naby Verlatensvlakte” speel in die Karoo naby Hebron af.Nina Olivier moet na haar man se dood probeer oorlewe in hierdie dorre wêreld en sy is boonop swanger. Die kluisenaar-geoloog Ralph Deutch se belangstelling in die Boesmans bring hom hierheen, maar hy worstel steeds met die trauma van sy kinderjare in Duitsland. Wanneer Nina se kind gebore word, draai sy by die dood om, maar Ralph neem haar hospitaal toe. Ook in die veld kom daar nuwe lewe na die welkome reën. Die gebeure in die roman “Winterhuis” speel af op die Oostelike Hooglande van Manikaland. Nancy se fisiese reis na die spits van die berg word ook ’n innerlike reis. Die helende invloed van die natuur op die mens en die onbreekbare band wat tussen verskillende kultuurgroepe bestaan om te kan oorleef word beskryf. Sy skryf ook die vakkundige werke “Music is healing” en “Music and babies”

Publikasies

Jaar	Publikasies
1991	Maria
1993	Herskep
	Rut
1997	Naby Verlatensvlakte
2001	Winterhuis
2006	Music is healing
2008	As die rooi papawers blom
2014	Music and babies

Bronnelys

Boeke

• Kannemeyer, J.C. “Die Afrikaanse literatuur 1652-2004” Human & Rousseau Kaapstad en Pretoria Eerste uitgawe 2005

Internet

• Frances le Roux: http://www.fhleroux.co.za/