Ginučiai

Ginučiai is 'n gehuggie op die oewer van die Linkmenas-meer in die Nasionale Aukštaitija-park in Oos-Litaue. Die dorp, wat langs 'n pad aangelê is en administratief aan die Ignalina-rajonmunisipaliteit behoort, het in 2001 'n bevolking van 69 gehad. Land- en bosbou is tradisioneel die belangrikste bronne van inkomste vir die bewoners. Die dorp het vanweë sy ligging in die nasionale park ook tot 'n toeristetrekpleister ontwikkel.

Ginučiai
Die historiese watermeul
Ginučiai
Koördinate: 55°23′06″N 25°59′46″O
Land	Litaue
Etnografiese streek	Aukštaitija
Rajonmunisipaliteit	Ignalina
Eerste verwysing	1554
Hoogte	130 m (430 ft)
Bevolking
• Totaal	69
Tydsone	UTC+2 (OET)
• Somertyd	UTC+3 (OEST)
Webwerf	Ginučiai

Besienswaardighede

Die belangrikste besienswaardighede is 'n historiese watermeul by die plaaslike stroompie - een van min meule in Litaue waar die oorspronklike 19de eeuse meganisme bewaar gebly het en wat tot nasionale monument van ingenieurswese verklaar is. Nog tot en met 1968 is in die meul hidroëlektrisiteit opgewek en koring tot meel gemaal. 'n Klein museum behandel die broodbakkuns. Die watermeul is met fondse van die Europese Unie gerestoureer.

Toerisme

Die Srove, een van talle riviere en stroompies in die omgewing

Ginučiai se klein plaaslike hotel met bistro is onder meer gewild vir troues, terwyl die historiese watermeul, waar toeriste ook geakkommodeer kan word, as spookplek bekend staan. Daar is ook oornaggeriewe vir besoekers by 'n nabygeleë kampeerterrein en op enkele boerderye in die omgewing.