Glasgow School of Art
Die Glasgow School of Art (GSA) is Skotland se enigste openbare selfbestuurde kunsskool wat akademiese opleiding op universiteitsvlak aanbied en navorsing oor argitektuur, skone kunste en ontwerpkuns doen. Die GSA word in verskeie geboue in die middestad van Glasgow gehuisves. Sy oorspronklike hoofgebou, die Mackintosh Building, wat na sy ontwerper en argitek Charles Rennie Mackintosh genoem is en as sy meesterwerk beskou word, was een van die ikoniese bakens van Skotland se weskusmetropool voordat dit deur twee brande in Mei 2014 en Junie 2018 vernietig is.
.jpg)
Terwyl die Mackintosh-gebou met Charles Rennie Mackintosh se innovatiewe werk gedurende die laat 1890's en vroeë 1900's verbind word, strek die kunsskool se oorspronge verder terug tot die middel van die 19de eeu. Dit is amptelik in Januarie 1845 gevestig as Glasgow se Government School of Design.
Brandrampe van 2014 en 2018
wysigIn Mei 2014 is die Mackintosh-gebou se wesvleuel, insluitende die biblioteek, deur 'n brand ernstig beskadig. Restourasiewerk was steeds aan die gang toe die gebou in die nag van 16 Junie 2018 deur 'n verwoestende brand volledig vernietig is. Meer as 120 brandbestryders het die vuur beveg. Kier Construction Scotland - die onderneming wat die restourasiewerk saam met die Glasgowse argitektepraktyk Page\Park Architects behartig het - was volgens nuusberigte nog besig om sprinkelaars te installeer wat eers weke later in bedryf gestel sou word.
Die hitte van die vuur en die vinnige afkoeling deur water tydens brandbestryding het ernstige skade by die muurwerk aangerig. Dit is blykbaar so groot dat die skool se bouval weens die gevaar van ineenstorting moontlik afgebreek moet word. Die omvang van die skade, wat aan die buitemure aangerig is, is enkele dae ná die brand bepaal toe 'n inspeksie met mobiele hyskrane, 'n laser en 'n hommeltuig gedoen is. Deskundiges het vasgestel dat 'n groot deel van die suidfasade verskuif het en afgebreek moet word. Groot skade is ook by die westelike en oostelike gewels berokken; die oostelike een het begin skuif.[1]
Die hele gebou is egter tydens die restourasieproses opgemeet en alle besonderhede gedokumenteer, terwyl baie van die interieur in stoorplekke buite die skool bewaar is. Tekeninge, foto's en 'n digitale bouplan sal die heropbou moontlik vergemaklik.[2] Die kunsskool se direkteur, Tom Innes, het in 'n onderhoud met die dagblad The Guardian op 10 Julie 2018 bevestig dat Mackintosh se argitektoniese meesterwerk herbou sal word. Die kunsskool was teen brandskade verseker sodat die koste van die heropbou gedek is.[3]
Die restourasiekontrak ter waarde van £25 miljoen, wat deur die Glasgow School of Art met Kier Construction Scotland aangegaan is, is op 29 Junie 2018 gekanselleer.
Verwysings
wysig- ↑ The Guardian, 28 Junie 2018: Large part of Glasgow School of Art to be urgently dismantled. Besoek op 28 Junie 2018
- ↑ BBC News, 17 Junie 2018: Glasgow art school blaze: Expert warns it may have to be demolished. Besoek op 17 Junie 2018
- ↑ The Guardian, 10 Julie 2018: Mackintosh building will be rebuilt, says Glasgow School of Art director. Besoek op 10 Julie 2018