Groot Victoriawoestyn

Die Groot Victoriawoestyn is 'n ylbevolkte woestynarea in Wes- en Suid-Australië.

Kaart van Australië wat die ligging van die Groot Victoriawoestyn aandui.

NASA – Die Groot Victoriawoestyn in die middel van die beeld, noord van die Nullarborvlakte.

Ligging en Beskrywing

Die Groot Victoriawoestyn is die grootste woestyn in Australië, en bestaan uit vele klein sandheuwels, grasvlaktes, soutpanne en oppervlakke met nou-gespasieerde keistene (wat woestynplaveisel of gibber-vlaktes genoem word). Dit is meer as 700 km lank van oos na wes, en beslaan 'n oppervlak van ongeveer 348 750 km², vanaf die Oostelike Goudveldstreek van Wes-Australië, tot tot by die Gawlerbergreeks in Suid-Australië. Die Klein Sandwoestyn lê na die noord-weste, die Gibsonwoestyn na die noorde, die Tirariwoestyn en Sturt Kliperigewoestyn lê na die ooste, terwyl die Nullaborvlakte na die suide dit van die Suidelike Oseaan skei.

Alhoewel die gemiddelde jaarlikse reënval laag en wisselvallig is, en tussen 200 en 250 mm per jaar (7,9 -9,8 duim) is, is donderbuie relatief algemeen, met 15 tot 20 donderstorms per jaar.

Die dagtemperatuur in die somer wissel tussen 32°C en 40°C, en in die winter val dit na tussen 18°C en 23°C.

Bevolking

Die inheemse Australiërs (onder andere van die Kogara, Mirning en die Pitjantjatjara groepe), maak die meerderheid van die area se bevolking uit. Dit is die gedeelte van Australië met die grootste inheemse bevolking. Die Aborigine-bevolking in hierdie area is aan die toeneem, met jong inheemse volwassenes wat in die Groot Victoriawoestyn werk aan die Wilurarra Skeppingsprogramme om hulle kultuur te onderhou en te ontwikkel.

Ten spyte van sy geïsoleerde ligging, word die Groot Victoriawoestyn deurkruis met ruwe paaie soos die Connie Sue Hoofweg en die Anne Beadell Hoofweg. Ander menslike aktiwiteite in die area sluit mynbou en kernwapentoetsing in.

Geskiedenis

Die Britse ontdekkingsreisiger Ernest Giles het in 1875 die eerste Europeër geword om hierdie woestyn te oorkruis. Na sy kruising het hy hierdie woestyn na die heersende Britse monarg van die tyd (koningin Victoria) genoem. In 1891 het David Lindsey se ekspedisie van noord na suid oor hierdie gebied gereis, en Frank Hann het tussen 1903 en 1908 in hierdie gebied goudeksplorasie gedoen. Len Beadell het in die 1960s die area verder verken.

Verwysings

• Shephard, Mark (1995), The Great Victoria Desert : north of the Nullarbor, south of the centre, Reed Books, ISBN 978-0-7301-0485-8 
• Joseph, Leo; Greenslade, Penelope; Barley, R. H. (Rachel); Nature Conservation Society of South Australia; Barley, Rachel (1986), The Great Victoria Desert, Nature Conservation Society of South Australia Inc, ISBN 978-0-949751-08-9 
• Peppas, Lynn (2013), The Great Victoria Desert, St. Catharines, Ontario Crabtree Publishing Company, ISBN 978-1-4271-9100-7 
• Friebe, Marlene; Matheson, W. E; South Australia. Department for Environment and Heritage; Friends of the Great Victoria Desert Parks (2006), Shrubs and trees of the Great Victoria Desert, Friends of the Great Victoria Desert Parks with the assistance of the Dept. for Environment and Heritage, ISBN 978-0-646-45948-6 
• Friends of the Great Victoria Desert Parks (S.A.) (2007), Friends of the Great Victoria Desert, The Friends of the Great Victoria Desert Parks, http://trove.nla.gov.au/work/37183566, besoek op 25 Junie 2017 

Eksterne Skakels

• Online natural history of Great Victoria Desert Geargiveer 10 April 2013 op Wayback Machine