Harold Shipman
| Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Harold Frederick Shipman[2] (14 Januarie 1946 – 13 Januarie 2004) was ’n Britse dokter in Hyde, naby Manchester, en een van die grootste reeksmoordenaars in die geskiedenis. Daar is bewys hy het tot 250 mense vermoor. Hy het die byname Dr. Dood en Engel van die Dood gekry.
| Harold Shipman | ||
| Gebore | 14 Januarie 1946 | |
| Oorlede | 13 Januarie 2004 (op 57) | |
| Rede vir dood | Selfmoord | |
| Land | Brittanje | |
| Bynaam | "Dr. Dood", "Engel van die Dood"[1] | |
| Beroep | Dokter | |
| Misdaad | Reeks moorde | |
| Misdaadbesonderhede | ||
| Plek | Hyde naby Manchester | |
| Datum(s) | 1975–1998 | |
| Slagoffers | 250+ | |
| Metode | Dodelike dosisse diamorfien | |
| Vonnisbesonderhede | ||
| Aangekeer | 7 September 1998 | |
| Vonnisdatum | 31 Januarie 2000 | |
| Vonnis | Lewenslange tronkstraf plus 4 jaar | |
Onraad en ondersoek
wysigIn Maart 1998 het dr. Linda Reynolds van Hyde, aangespoor deur Deborah Massey van ’n begrafnisondernemer, teenoor die lykskouer John Pollard haar kommer uitgespreek oor die hoë voorkoms van sterftes onder Shipman se pasiënte. Sy was veral bekommerd oor die getal verassingsvorms vir ouer vroue wat hy laat mede-onderteken het.
Die saak is onder die aandag van die polisie gebring, maar hulle het nie genoeg bewyse gehad om hom aan te kla nie. Tussen 17 April 1998, toe die polisie die saak laat vaar het, en Shipman se eindelike arres het hy nog drie mense vermoor.[3][4] Sy laaste slagoffer was Kathleen Grundy, wat op 24 Junie 1998 dood in haar huis aangetref is. Shipman was die laaste mens wat haar lewend gesien het. Hy het later haar doodsertifikaat onderteken en die oorsaak aangedui as "ouderdom".
Grundy se dogter, die prokureur Angela Woodruff, het onraad bemerk toe sy meegedeel word sy en haar kinders word nie in die testament genoem nie, maar haar ma het £386 000 aan Shipman nagelaat. Dit is by die polisie aangemeld en hulle het ’n ondersoek begin. Grundy se lyk is opgegrawe en daar is spore van diamorfien in haar liggaam ontdek – dit word dikwels gebruik as pynstiller in terminale kankerpasiënte. Shipman is op 7 September 1998 in hegtenis geneem. ’n Soortgelyke tikmasjien as die een waarop die vervalsde testament getik is, is in sy besit ontdek.[5]
Die polisie het toe nog 15 mense se dood ondersoek waarvoor Shipman doodsertifikate uitgereik het. Hulle het ’n patroon van dodelike dosisse diamorfien gevind. Mediese rekords is vervals om aan te dui die pasiënte se gesondheid was swak.[6]
Vonnis en gevolg
wysigShipman is op 31 Januarie 2000 deur ’n jurie skuldig bevind aan 15 moorde. Hy het lewenslange tronkstraf gekry plus vier jaar vir die vervalsing van Grundy se testament; die regter het aanbeveel dat hy nooit vrygelaat word nie.
Ná sy verhoor is ’n ondersoek gehou na al die doodsertifikate wat deur Shipman uitgereik is. Dit het op 1 September 2000 begin en twee jaar geduur. Sowat 80% van sy slagoffers was vroue; sy jongste slagoffer was ’n 41-jarige man.[7] ’n Groot deel van Brittanje se regstelsel rakende gesondheidsorg en medisyne is hiersien en aangepas as ’n regstreekse of onregstreekse gevolg van die Shipman-moorde.
Hoewel ander Britse dokters al van moord aangekla is, is Shipman die enigste een wat al skuldig bevind is daaraan dat hy sy pasiënte vermoor het.[8]
Shipman is op 13 Januarie 2004, ’n dag voor sy 58ste verjaardag, dood nadat hy hom in sy sel opgehang het.
Verwysings
wysig- ↑ "Shipman known as 'angel of death'". BBC News (in Engels). BBC. 9 Julie 2001. Geargiveer vanaf die oorspronklike op 20 September 2008. Besoek op 5 September 2014.
- ↑ Harold Shipman: The killer doctor BBC News, 13 Januarie 2004
- ↑ Second Report — The Police Investigation of Maart 1998 (Cm 5853). The Shipman Inquiry. 14 Julie 2003. Geargiveer vanaf die oorspronklike op 5 Maart 2005. Besoek op 1 November 2014.
- ↑ "Shipman inquiry criticises police" (in Engels). BBC News. 14 Julie 2003. Geargiveer vanaf die oorspronklike op 11 Februarie 2007. Besoek op 1 November 2014.
- ↑ "The Shipman tapes I". BBC News (in Engels). 31 Januarie 2000. Geargiveer vanaf die oorspronklike op 23 Oktober 2019. Besoek op 27 September 2008.
- ↑ "UK Doctor 'forged victim's medical history'". BBC News (in Engels). 8 November 1999. Geargiveer vanaf die oorspronklike op 9 Oktober 2019. Besoek op 27 September 2008.
- ↑ "The Shipman Inquiry". The Shipman Inquiry. Geargiveer vanaf die oorspronklike op 9 Augustus 2009. Besoek op 4 Junie 2010.
- ↑ James Stovold. "The Case of Dr. John Bodkin Adams". Strangerinblood.co.uk. Geargiveer vanaf die oorspronklike op 2 September 2015. Besoek op 4 Junie 2010.
Eksterne skakels
wysig- Die Shipman-ondersoek Geargiveer 26 April 2012 op Wayback Machine
- BBC — Die Shipman-moorde
- Lys van beweerde moorde
Hierdie artikel is vertaal uit die Engelse Wikipedia
