Hedi Slimane
Hedi Slimane ([eˈdi sliˈman]; * 5 Julie 1968) is 'n Franse fotograaf en modeontwerper. Tussen 2000 en 2007 het hy die pos van kreatiewe direkteur vir Dior Homme, die modehuis Christian Dior se mansklerereeks, beklee. Vanaf 2012 tot 2016 was hy kreatiewe direkteur vir Yves Saint Laurent. Laat in Januarie 2018 het die Franse vervaardiger van luukse goedere LVMH bekend gemaak dat Slimane opvolger sou word van Phoebe Philo as Artistic, Creative and Image Director vir die modehuis Céline waar hy damesmodes sal ontwerp asook nuwe reekse met Haute Couture-mode en mansklere loods. Daarnaas sal hy betrokke wees by die markinvoering van Céline-reukwater en die ontwerp en opening van Céline-modewinkels.
Hedi Slimane | |
|---|---|
 Hedi Slimane in 2015 | |
| Gebore | 5 Julie 1968 |
| Nasionaliteit |  Frankryk |
| Beroep | Modeontwerper en fotograaf |
| Bekend vir | Ontwerpe vir Christian Dior en Saint Laurent Paris |
| Webwerf | hedislimane.com |
In November 2018 het die tydskrif Vanity Fair Hedi Slimane eerste geranglys in sy jaarlikse lys van die "50 invloedrykste Franse persoonlikhede ter wêreld". Slimane het wonings in Parys en Los Angeles (sedert 2007). Slimane se besluit om die Saint-Laurent-ontwerpateljee na Los Angeles te verskuif was 'n huldeblyk aan die Suid-Kaliforniese metropool se groeiende modebedryf.[1]
Vroeë lewe
wysig
Slimane is in 1968 in die 19de arrondissement (stadsdistrik) van Parys vir 'n Tunisiese vader en Italiaanse moeder gebore. Op die ouderdom van 11 is sy belangstelling vir fotokuns gewek, en hy het sy eerste kamera ontvang en vinnig geleer hoe om prentjies in 'n donkerkamer te ontwikkel.
Alhoewel nie van voorneme was om 'n loopbaan in die modebedryf te volg nie, het hy as 16-jarige begin om sy eie klere te ontwerp. Later het hy kunsgeskiedenis aan die Louvre-skool (École du Louvre) gestudeer en 'n beroepsopleiding as kleremaker in 'n modehuis vir mans gevolg. Vroeg in sy loopbaan het hy ook belang gestel in joernalisme en verslaggewing. Hiervoor het hy besoeke gebring aan die redaksiekantore van die gesiene dagblad Le Monde.