Hoessein, kroonprins van Jordanië
Hoessein bin Abdoellah (Arabies: حسين بن عبد الله, Ḥusayn ibn ʿAbdullāh; gebore op 28 Junie 1994) is die regmatige troonopvolger van koning Abdoellah II van Jordanië. Hy behoort tot die Hasjemitiese familie, wat sedert 1921 oor die land regeer.
| Hoessein | |
|---|---|
| Kroonprins van Jordanië | |
.jpg) Hoessein in 2019.
| |
| Gebore | 28 Junie 1994 Amman, Jordanië |
| Volle naam | Hoessein bin Abdoellah bin Hoessein bin Talal |
| Huis | Hasjim |
| Vader | Abdoellah II van Jordanië |
| Moeder | Rania al-Jassim |
| Godsdiens | Soenni-Islam |
| Militêre loopbaan | 1ste luitenant in die Jordaniese weermag |
Lewe
wysigHy is op 28 Junie 1994 in Amman gebore as die oudste kind van die destydse prins Abdoellah en sy vrou, prinses Rania.[1] Hy beskou homself as ’n afstammeling van die profeet Mohammed, deur Mohammed se dogter Fatimah, en van Ali, die vierde kalief.[2] Die Hasjemiete het 700 jaar lank oor Mekka regeer totdat dit deur die Huis van Saoed verower is, en regeer sedert 1921 oor Jordanië.[3]
Hoessein, wat tans ’n 1ste luitenant in die Jordaniese weermag is, het sy opvoeding in Jordanië begin en in 2016 ’n graad in internasionale geskiedenis aan die Georgetown-universiteit in Washington, D.C., behaal. Sedert hy in 2012 meerderjarig geword het, het hy op verskeie geleenthede as regent opgetree en het hy sy pa op ’n paar plaaslike en internasionale besoeke vergesel. Hoessein is in beheer van die Kroonprinsstigting, wat verantwoordelik is vir ’n tegniese universiteit en ’n paar wetenskaplike en humanitêre inisiatiewe.
In 2015, op 20-jarige ouderdom, was Hoessein die jongste persoon wat voorsitter van ’n sessie van die VN se Veiligheidsraad was. Nadat hy in 2017 aan Sandhurst in Brittanje gegradueer het, het hy ’n wêreldwye debuut gemaak toe hy die VN se Algemene Vergadering in September toegespreek het. Waarnemers vermoed hy sal eersdaags begin om ’n prominenter rol in Jordanië en oorsee te speel.
Verwysings
wysig- ↑ "Abdullah II". Encyclopædia Britannica (15de) I: A-ak Bayes. (2010). Chicago, Illinois: Encyclopædia Britannica Inc.. 23. ISBN 978-1-59339-837-8.
- ↑ "Hashemite Ancestry". alhussein.jo (in Arabies). 1 Januarie 2014. Geargiveer vanaf die oorspronklike op 6 Augustus 2019. Besoek op 10 Augustus 2017.
- ↑ "King Hussein is dead" (in Engels). CNN. 7 Februarie 1999. Geargiveer vanaf die oorspronklike op 4 September 2019. Besoek op 23 September 2017.
Eksterne skakels
wysig
Wikimedia Commons het meer media in die kategorie Hoessein, kroonprins van Jordanië.
Hierdie artikel is vertaal uit die Engelse Wikipedia
