Hotel zum Schwan
Die Hotel zum Schwan ("Swaan-hotel") was 'n befaamde hotel in Frankfurt am Main wat tussen 1592 en 1919 bestaan het. Die laaste in 1792 nuut opgerigte hotelgebou is in 1944 tydens geallieerde lugaanvalle vernietig. Later het op die perseel 'n rolprentteater en 'n filiaal van die boekwinkelketting Hugendubel ontstaan. Die laasgenoemde bestaan steeds.
Die Schwan was veral in die 19de eeu een van Europa se mees vooraanstaande luukse hotelle. Dit het historiese betekenis gekry met die Vredesooreenkoms van Frankfurt wat hier op 10 Mei 1871 onderteken is en waarmee die Frans-Duitse Oorlog beëindig is. Die meubilering van die sogenaamde "Vredeskamer", waar die vredesverdrag deur die Duitse rykskanselier Otto von Bismarck en die Franse minister van buitelandse sake, Jules Favre, onderteken is, het bewaar gebly en word tans in Frankfurt se Historiese Museum vertoon.[1]