Die Internet Adult Film Database (IAFD) is ’n aanlyn databasis van inligting oor die pornografiebedryf in Amerika: pornosterre, -regisseurs en -rolrente.[1] Dit is soortgelyk aan die Internet-rolprentdatabasis (IMDb) in die sin dat dit oop is vir die publiek en soektogte moontlik is. Prente wat nie in Amerika vervaardig is nie, is in die databasis indien ’n Amerikaanse uitreiking beskikbaar is; dan word die inligting oor die Amerikaanse weergawe verskaf.

Internet Adult Film Database
URL www.iafd.com
Kommersieel? Ja
Soort webwerf Pornografie
Rolprentdatabasis
Beskikbare tale Engels
Gelanseer 1995
Huidige status Aanlyn

Geskiedenis wysig

Die voorloper van IAFD was ’n e-pos- en FTP-databasis van porno-aktrises met die naam Abserver wat in 1993 deur Dan Abend begin is.[2] IAFD self is begin deur Peter van Aarle, wat sedert 1981 data oor pornoflieks versamel het.[3] In 1993 het hy tot die Usenet-nuusgroep alt.sex.movies begin bydra, en daar het hy Dan Abend ontmoet. Die twee het databasisse begin uitruil en saam begin werk aan ’n WWW-gebaseerde databasis.[4]

Van Aarle het later op dié databasis saamgewerk met Ron Wilhelm, wat die skuilnaam "Heretic" gebruik het.[5] Die eerste weergawe van die IAFD was in 1995 aanlyn danksy die programmeringspogings van Wilhelm, wat die projek gebruik het as opleidingsterrein vir SGML-programmering, wat hy op kollege geleer het. Nadat Wilhelm die internet verlaat het om by die weermag aan te sluit, het die webtuiste eindelik verval.

In die herfs van 1998 was Van Aarle op ’n handelskou saam met Jeff Vanzetti, wat hom gevra het of hy daarin belangstel om die IAFD te herskep – hierdie keer onder sy eie domein. Vanzetti was op die uitkyk vir ’n projek waarmee hy homself aanlyn databasisprogrammering kon leer deur die gebruik van die SQL-bediener. Dit het soos die ideale projek gelyk omdat hulle albei medemoderators van die nuusgroep rec.arts.movies.erotica (RAME) was en lede van die groep altyd gekla het oor die verval van die oorspronklike Internet Adult Film Database.[3]

Aan die begin van 1999 is die eerste stappe geneem om die IAFD weer op die been te bring. Aanvanklik kon net aktrises in die soekkassie opgespoor word en data is beperk tot flieks van ná 1989. Van Aarle wou nie vroeëre flieks in die databasis hê nie omdat hy gedink het as hy ooit kommersiële nut daaruit wou put, moes hy die waardevolste inligting eers vir homself hou. Die data oor die ouer titels was die moeilikste om in die hande te kry en min mense het daaroor beskik. Die afsnydatum van 1989 was ’n skikking om ten minste die titels van Buttman in te sluit, want hy was een van die gewildste regisseurs van dié tyd.[3]

Van Aarle is op 18 September 2005 op 42-jarige ouderdom aan ’n hartaanval oorlede.[6][7]

Op 1 Maart 2007 het die IAFD inligting oor meer as 18 000 gay titels en 39 000 gay akteurs beskikbaar gestel.[8] Nes met die IMDb word vorms gebruik om datakorreksies in te stuur, hoewel die IAFD se vorms aansienlik eenvoudiger is as die IMDb s'n. Volgens die IAFD se webtuiste in 2020 bevat dit inskrywings van 490 038 titels en 200 604 persone (beide akteurs en regisseurs).

Volgens Vanzetti voeg die IAFD sowat 500 nuwe titels per maand by en verwerk dit duisende korreksies – wat enigiemand kan instuur om oorweeg te word.[9] Die IAFD het ’n span redakteurs wat redaksionele beheer uitoefen oor wat op die webtuiste geplaas word en seker maak die feite is reg.[1]

Die IAFD kry geld van adverteerders en ’n kommissie van produkte wat deur hul webskakels verkoop word.[1]

Sien ook wysig

Verwysings wysig

  1. 1,0 1,1 1,2 "Internet Adult Film Database - frequently asked questions". IAFD (in Engels). Geargiveer vanaf die oorspronklike op 14 Mei 2020. Besoek op 6 Januarie 2017.
  2. "Adult Film Database". Besoek op 8 Maart 2007.
  3. 3,0 3,1 3,2 "remembering peter van aarle" (in Engels). IAFD. Geargiveer vanaf die oorspronklike op 14 Mei 2020. Besoek op 5 Januarie 2008.
  4. "ASM File Server". Besoek op 8 Maart 2007.
  5. "25.2 Heretic's Adult Movie Database" (in Engels). Geargiveer vanaf die oorspronklike op 29 Februarie 2020. Besoek op 5 Januarie 2008.
  6. "IAFD Curator Has Died". Adult Video News. 20 September 2005. Geargiveer vanaf die oorspronklike op 7 Julie 2012. Besoek op 25 Oktober 2009.
  7. "Van Aarle "Irreplaceable"". Adult Video News. 22 September 2005. Geargiveer vanaf die oorspronklike op 10 Julie 2012. Besoek op 25 Oktober 2009.
  8. "Internet Adult Film Database Adds Gay". XBIZ. 5 Maart 2007. Geargiveer vanaf die oorspronklike op 5 Januarie 2013. Besoek op 25 April 2007.
  9. Bob Preston (5 Maart 2007). "IAFD: Looking Ahead". XFanz. Besoek op 3 Desember 2010.

Eksterne skakels wysig