Indre Mission
Die Kerklike Vereniging vir die Binnesending in Denemarke (Deens: Kirkelig Forening for den Indre Mission i Danmark, ingekort tot Indre Mission) is ’n konserwatiewe Lutherse Christelike organisasie in Denemarke. Dit is die grootste herlewingsbeweging binne die Deense Volkskerk. Ongeag sy naam, is die lede van die Indre Mission nie afsonderlik van ander gemeentes nie. Pleks daarvan dien die liggaam eerder as grondslag om gemeentelike aktiwiteite te ondersteun.
Geskiedenis wysig
Die beweging is op 13 September 1861 in die Stenlille-dorpie op Seeland gestig. Die naam Indre Mission het betrekking op plaaslike sendingwerk, wat m.a.w. op gekerstende mense van toepassing is, anders as die vele organisasies wat in die buiteland en die heidene bedien.
Indre Mission het ’n invloed gehad op drankbestryding, verskeie gesamentlike inisiatiewe binne landelike gemeenskappe en andersins ook die pogings om die 19de eeuse volk te beskaaf. Baie van die armes kon deur hierdie beweging ’n gemeenskap vind waar hul op gelyke voet met die meer welgesteldes kon verkeer. Dit is bewerkstellig deur die klem van die verskeidenheid groepsaktiwiteite op Christelike gemeenskaplikheid te plaas. Daar word beweer dat hierdie beweging, as liggaam binne die Deense Volkskerk, die uitstroming van lidmate na charismatiese vrykerke en sektes gestuit het. In Denemarke was die hoeveelheid lidmate van vrykerke en sektes nooit so talryk soos in ander lande, soos byvoorbeeld Swede, nie.
Die stigtersgesin van die LEGO-maatskappy, sowel as baie van die werknemers wat in die Sentraal-Jutlandse dorpie Billund gebly het, was aanhangers van die Indre Mission-beweging. In 1952 het die maatskappy ’n kruis gemaak wat in die donker kan gloei, wat een van sy enigste bekende godsdienskunswerke is.
Eietydse beweging wysig
’n Aansienlike getal volgelinge kan as Bybelfundamentaliste omskryf word. Daar word klem gelê op die Lutherse leerstellings en kan daarom nie as ’n ekumeniese beweging beskou word nie, hoewel dit ’n wyse is om versplintering van die gemeente te voorkom. Oor die afgelope paar jaar is minder eenvormige doktrines deurgevoer. Die tradisionele dogmas was gekant teen drankgebruik, dans, kaartspel, vloek en werk op Sondae.
Indre Mission het tradisioneel sy vesting in die landelike Wes-Jutland gehad, maar baie gemeenskappe dwarsoor Denemarke, onder andere Haslev op Seeland en dié van ander dorpe, het ook aanklank by die beweging gevind. Indre Mission was dwarsoor Denemarke eens 1 000 sendinghuise sterk, maar het egter tot 400 gekwyn wat vandag nog in gebruik is. Hierdie sendinghuise word gebruik vir Sondagskool, gebed, asook geestelike en herlewinglesings. Vandag is die hoofkwartier in Fredericia geleë.
Eksterne skakels wysig
- Webwerf in Engels Geargiveer 27 Junie 2012 op Wayback Machine
- Indre Mission-Kruis