Ingenieurswese-geboue UP
Die Ingenieurswese I-gebou op die Hatfieldkampus van die Universiteit van Pretoria is in 1975 voltooi. Dié gebou was die eerste wolkekrabber wat op kampus opgerig is. Dit is ontwerp deur die argitek Brian Sandrock, 'n alumnus van die universiteit. Dit is gebou om die universiteitsplein beter te definieer en as ’n landmerk en sodat dit nie die uitsig van die Ou Kunstegebou vanaf Universiteitweg belemmer nie – daarom die elevasie. Daar was van ingewikkelde boumetodes gebruik gemaak tydens die oprigting van die gebou. Die twee torings is eerste gebou waarna die vloere van bo na onder binne ’n raamwerk gehang en verbind is met kabels. Die gebou is letterlik van bo af na onder gebou. Benewens die departemente van die Fakulteit Ingenieurswese, beskik die gebou ook oor navorsingsgeriewe, lesingsale en kantoorspasie.[1]
Die Ingenieurswese II-gebou het aanvanklik as die JG Strijdomgebou bekend gestaan. Dit is soortgelyk aan die Mineralewetenskappegebou, aangesien die argitekfirma Meiring en Naudé reeds planne vir die bou van ’n spieëlbeeld van dié gebou gehad het. Beide geboue toon aspekte van die Klein Brasiliaanse of Moderne Brasiliaanse styl, ook bekend as die Kobrastyl. Die gebou is opgerig om bykomende ruimte vir die Fakulteit Ingenieurswese te skep en dit kon aanvanklik 1200 studente akkommodeer nadat dit in 1960 in gebruik geneem is. Die hoeksteen is op 6 April 1957 deur Eerste Minister J.G. Strijdom gelê. Die gebou is oor die jare verskeie kere uitbrei.[2]
Konstruksie aan die Ingenieurswese III-gebou het in September 2009 begin, nadat die regering die behoefte om meer ingenieurs op te lei geïdentifiseer het. Dit, tesame met 'n behoefte aan bykomende parkeerplek vir die universiteit se studente, personeel en besoekers, was die dryfkrag agter die konstruksie van hierdie gebou en parkade. Dié vier-verdieping-gebou is in 2011 voltooi, en beskik oor parkeergeriewe vir 1000 voertuie, ses groot lesingsale (twee 500-sitplek lesingsale en vier 200-sitplek lesingsale), 'n 450-sitplek tekeningsaal, 17 laboratoriums, twee klankkamers, sowat 41 kantore en 25 nagraadse kantore. Die parkade is geleë op vier vlakke, waarvan twee ondergrondse verdiepings is, terwyl die nuwe lesingsfasiliteite in die boonste twee verdiepings gehuisves word.[3]