Inkubasie

Inkubasie is 'n vakterm uit die biologie wat verwys na 'n tydperk van ontwikkeling by voëls en ander organismes soos bakterieë.

Inkubasie by voëls

Hennetjie besig om te broei

In die voëlryk verwys "inkubasie" na die tydperk wat die volwasse voël op die eiers broei/dit warm hou en waarin die embrio ontwikkel totdat dit gereed is om die dop van binne oop te breek en buite die eier te leef.

Die tydsduur van inkubasie hang hoofsaaklik af van twee faktore – die grootte van die eier en die tempo waarteen die embrio ontwikkel. Vir 'n volle broeisel word die tyd van inkubasie bepaal vanaf die dag waarop die laaste eier gelê is tot die dag waarop laaste eier uitbroei. Oor die algemeen geld die volgende reël: Hoe groter die eier, hoe langer is die tyd van inkubasie.

Verder bepaal die ligging van die nes en die struktuur van die nes ook hoe lank inkubasie sal duur. Vir eiers in toe neste en weggesteekte neste is die inkubasietyd langer, maar in oop en blootgestelde neste is dit weer korter. Voëls wat op die grond nesmaak het dus oor die algemeen 'n korter inkubasietyd as voëls waarvan die neste in bome of bo grondvlak is.