Instruments (toepassing)
Instruments (voorheen Xray) is ’n toepassingverrigtingsontleder en -visualiseerder wat in Xcode 3.0 en nuwer weergawes van Xcode geïntegreer is. Dit is ’n ontwikkelaarshulpmiddel wat in Mac OS X v10.5 en latere weergawes ingesluit is en wat gebou is bo-op die DTrace nasporingsraamwerk van OpenSolaris en na Mac OS X oorgedra is.
| Instruments | |
| Ontwikkelaar | Apple Inc. |
|---|---|
| Nuutste weergawe | 2.7/ 15 Maart 2011 |
| Bedryfstelsel | Mac OS X |
| Kategorie | Nasporing (programmatuur) |
| Lisensie | Eiendomsprogrammatuur |
| Webblad | developer.apple.com |
Instruments vertoon ’n tydlyn van enige gebeure, soos SVE-aktiwiteitsvariasie, geheuetoewysing en netwerk- en lêeraktiwiteit, wat in die toepassing plaasvind, saam met grafieke en statistiek. Gebeure kan in groepe waargeneem word deur middel van aanpasbare “instrumente” wat in staat is om gebruikergegenereerde gebeure op te neem en dit soveel keer as wat nodig is, presies weer te gee sodat ’n ontwikkelaar die effek van kodeveranderings kan sien sonder om die repeterende werk te moet doen. Die Instrument Builder-eienskap laat die skep van pasgemaakte ontledingsinstrumente toe.
Ingeboude instrumente kan die volgende naspoor:
- Gebruikergebeure soos die druk van sleutelbordknoppies en muisbewegings en -klikke met die presiese tyd daaraan verbonde.
- SVE-aktiwiteit van verwerkings en liggewigprosesse.
- Geheuetoedeling en vrystelling, geheuesanering en geheuelekkasies.
- Of lêers gelees, geskryf of gesluit is.
- Netwerkaktiwiteit en -verkeer.
- Grafika en innerlike werking van OpenGL.
Sien ook
wysig
| Hierdie artikel is in sy geheel of gedeeltelik vanuit die Engelse Wikipedia vertaal. |
