Jan Fourie

Jan Fourie is skrywer van verskeie boeke oor die omgewing van Gansbaai en Dangerpoint. Hy is getroud met die skrywer en dramaturg S.D. (Sophie) Fourie.

 Lewe en werk

Jan Fourie is vir meer as dertig jaar onderwyser op Gansbaai en woon op Omaheke op Franskraal. Hy is getroud met S.D. Fourie, wat as dramaturg verskeie pryse vir haar hoorspele wen, onder andere die jaarlikse Radio Sonder Grense radiodramakompetisie in 2008. Die egpaar het twee seuns en ’n dogter. Gesamentlik stig en bedryf hulle die private Strandveld Museum op die hange van die see by Franskraalstrand, waar onder andere die grootste versameling artefakte van die legendariese skip HMS Birkenhead aangetref kan word. Hierdie is een van die interessantste Suid-Afrikaanse skeepswrakke en is wêreldwyd bekend omdat die stranding daarvan in 1862 die reël neergelê het van “vrouens en kinders eerste”. Saam met sy vrou bied hulle ook toere van die omgewing aan.

 Skryfwerk

“Wisselstrale oor die Strandveld” se tema is die kus rondom Dangerpoint, met die titel wat verwys na die vuurtoring se flitsende ligte. Die boek word uitgegee met die honderdjarige bestaan van die vuurtoring en bevat agtien vertellings van die seedramas, die natuurfratse en die mense van die kontrei. Hierdie vertellings het voorheen oor ’n lang tydperk in Die Burger verskyn. “Dagbreek oor Dyerseiland” is ’n boek wat hy self uitgee. Hy is een van die min mense wat nog die voorreg kon smaak om die eiland te besoek en het deeglik en oor baie jare navorsing gedoen oor die eiland, sy mense, sy natuurlewe en sy seediere. Die boek maak die eiland en sy geheimenisse vir die eerste keer toeganklik vir die publiek en word deur talle foto’s geïllustreer. Die boek word ook in Engels vertaal as “Dawn at Dyer”. Hy skryf saam met sy vrou verskeie streeksboeke. In “Duskant die duine” bundel hulle nog ’n aantal stories rondom die mense en gebeure van hierdie kontrei, waaronder sy ooggetuieverslag as kind van die herwinning van die gestrande skip City of Lincoln in 1946. Ander gesamentlike streeksboeke is “Kare Nawa, Namibië” en “Kersklokkies oor Branderbaai”. Hy en sy vrou gee ook die “Laerskool Gansbaai gedenkblad 1906–2006” uit.

Publikasies

Jaar	Publikasies
1994	Wisselstrale oor die Strandveld
1998	Dagbreek oor Dyerseiland
2005	Duskant die duine (saam met S.D. Fourie)
2006	Laerskool Gansbaai gedenkblad 1906–2006 (saam met S.D. Fourie)
2008	Kare Nawa, Namibië (saam met S.D. Fourie)
2010	Kersklokkies oor Branderbaai (saam met S.D. Fourie)

Bronnelys

Boeke

• Kannemeyer, J.C. “Die Afrikaanse literatuur 1652-2004”. Human & Rousseau. Kaapstad en Pretoria. Eerste uitgawe. 2005.

Internet

• Die Burger: http://152.111.1.87/argief/berigte/dieburger/1995/01/18/11/5.html
• Gansbaai boek: https://xplorio.com/gansbaai/the-gansbaai-book/
• Spaarwater, Pieter. Die Burger: http://152.111.1.87/argief/berigte/dieburger/1994/12/30/5/6.html^{[dooie skakel]}
• Van Rensburg, Cas. Beeld: http://152.111.1.88/argief/berigte/beeld/2011/09/19/B1/13/lanternswaaier_hoofresensie.html^{[dooie skakel]}