Kauai

Kauai (Hawais: Kauaʻi) is die vierde grootste en oudste eiland van die Hawaise Argipel. Die eiland het meer as agt miljoen jaar gelede as 'n vulkaankeël uit die see verrys. Die vulkaan is lankal geblus, en die lawarotse op die eiland is oor duisende jare deur wind, reën en getye verweer tot vrugbare grond.

Kauaʻi Die Tuineiland
Satellietfoto van Kauaʻi
Geografie
Ligging	22°05′N 159°30′W
Oppervlakte	1 430,4 vk km
Geranglys	4de grootste eiland van die VSA-deelstaat Hawaii
Hoogste punt	Kawaikini   1 598 m
Demografie
Bevolking	65 689 (2008)
Bevolkingsdigtheid	41/vk km
Amptelike simbole
Blom	Mokihana (Melicope anisata)
Kleur	Poni (purper)

Die hange teen die bergpieke in die middel van die eiland – soos Waialeale – behoort tot die natste plekke op aarde: die jaarlikse reënval beloop hier meer as 12 000 millimeter. In 1928 is selfs jaarlikse rekordneerslae van 22 000 millimeter aangeteken. Die verdamping van groot hoeveelhede water en die plaaslike topografie met opwaartse hellings laat die heersende vogtige Passaatwinde vinnig styg en veroorsaak sodoende die swaar reën wat gereeld oor die eiland uitsak. Danksy die groot watermassa's is Kauai dan ook die enigste Hawaii-eiland waar egte riviere voorkom.

Saam met Niihau, die "Verbode Eiland", wat saam met Kauai geadministreer word, neem die eiland ook in ander opsigte 'n besondere posisie in die Hawaii-eilandgroep in. Vanweë sy ligging in die noordelike uithoek van die argipel kan Kauai nie vanaf enige ander eiland gesien word nie – om kartografiese redes word dit op toeristekaarte dikwels nader aan die hoofeiland Oahu verskuif.

Kauai was die eerste Hawaii-eiland waar kaptein James Cook op 21 Januarie 1778 voet aan wal gesit het en die laaste eiland van die argipel wat koning Kamehameha I se oproep tot politieke vereniging van alle eilande nagekom het. Terwyl alle ander Hawaii-eilande reeds teen die einde van die 18de eeu deur die heerser verower is, het die bewoners van Kauai hulle eers in 1810 vrywillig aan sy heerskappy onderwerp om 'n oorlog op hulle eiland te voorkom.

Kauai as een van die mees afgeleë Hawaii-eilande is met sy lang ongerepte strande, skoon seewater en palms steeds 'n trekpleister vir toeriste wat op soek is na die rustigheid en bekoring van 'n tropiese eiland. Kauai het sy bynaam "Tuineiland" aan die geurige mohikana-bessies en bloeisels te danke wat hier oral blom.