Kensal Green-begraafplaas
.jpg)
Kensal Green Cemetery
Ligging
Kensal Green, Kensington
Londen, Verenigde Koninkryk
Gevestig in
1832
Oppervlakte
72 akkers (29 hektaar)
Permanente grafte
65 000+
Status
Steeds in gebruik
Die Kensal Green-begraafplaas (Engels: Kensal Green Cemetery) is 'n begraafplaas in Kensal Green, 'n stadsdeel in die Wes-Londense distrik Royal Borough of Kensington and Chelsea. As voorbeeld vir Kensal Green, wat deur die advokaat George Frederick Carden gestig en in 1833 geopen is, het die beroemde Paryse Père-Lachaise-begraafplaas gedien.
Vandag strek Kensal Green, wat aan 'n kanaal - die Grand Union Canal - grens, oor 'n oppervlakte van 72 akkers en sluit ook twee bewaringsgebiede in. Die begraafplaas is die habitat van ten minste 33 voëlspesies en ander diere. Sy grafmonumente wissel van groot mausoleums, waarin welvarende en bekende persoonlikhede ter ruste gelê is, tot 'n verskeidenheid kleiner grafte. Dele van Kensal Green is aan jong oorledenes gewy.
Kensal Green, wat oorspronklik deur die General Cemetery Company opgerig en bestuur is, is een van sewe tuinagtige begraafplase in Londen waarna informeel as die Magnificent Seven verwys word. Met drie kapelle, wat oopstaan vir aanhangers van alle gelowe en van alle sosiale agtergronde, bied Kensal Green sedert sy opening 'n waardige en rustige plek waar oorledenes herdenk kan word. Die Engelse skrywer G. K. Chesterton (1874–1936) het die begraafplaas onsterflik gemaak met enkele lyne van sy gedig The Rolling English Road wat in die werk The Flying Inn verskyn het:
|
For there is good news yet to hear and fine things to be seen; Before we go to Paradise by way of Kensal Green. |
|
Ondanks die klassieke voorkoms van sy hoofgeboue, waaronder die toegangsgeboue wat volgens die Griekse antieke styl ontwerp is, het Kensal Green 'n sterk Gotiese karakter danksy die groot aantal grafmonumente in dié styl. Die begraafplaas het vanweë sy besondere atmosfeer as coulisse vir 'n verskeidenheid rolprente gedien, waaronder Theatre of Blood waarin Vincent Price en Diana Rigg die hoofrolle vertolk het.
Eksterne skakels
wysig
Wikimedia Commons het meer media in die kategorie Kensal Green-begraafplaas.- (en) Amptelike webwerf
