Kerk van Ierland

Die Kerk van Ierland (Engels: Church of Ireland, Iers: Eaglais na hÉireann, Ulster-Skots: Kirk o Airlann) is 'n Christelike kerk in Ierland en 'n outonome kerkprovinsie binne die Anglikaanse Gemeenskap. Dit is op 'n gesamentlike grondslag vir die hele eiland georganiseer en is tans die tweede grootste Christelike kerk op die eiland Ierland na die Rooms-Katolieke Kerk.

Soos ander Anglikaanse kerke het die Kerk van Ierland voor-Reformatoriese elemente en praktyke bewaar, soos sy hiërargiese episkopalistiese organisasievorm met biskoppe as plaaslike kerkleiers, terwyl die biskop van Rome of pous se aanspraak op die hoogste gesag in alle kerklike sake verwerp word. In sy teologie en liturgie is baie beginsels van die Protestantse Hervorming verwesenlik - veral diegene wat gedurende die Engelse Reformasie aanvaar is.

Die Kerk van Ierland beskou homself as beide Katoliek en Gereformeerd. Binne die kerk bestaan daar sowel strominge wat die kerk se Katolieke karakter beklemtoon (hoë kerk of high church) asook lede wat hul geloof in die Protestantse of evangelikale tradisie beoefen (lae kerk of low church). Om historiese en kulturele redes word die Kerk van Ierland as 'n Protestantse kerk beskou.

Die Keltiese Kerk, wat met die sendingwerk van Sint Patrick in die 5de eeu in Ierland ontstaan het, word steeds erken as die oorsprong van die moderne Kerk van Ierland. Sy diosesane en parogiale struktuur is reeds eeue gelede gevestig, terwyl die Protestantse Hervorming in die 16de eeu die belangrikheid van die individu se verhouding tot God beklemtoon het en die Kerk laat herbesin het oor sy Bybelse fondament.

Die Kerk van Ierland het altesaam 375 000 lidmate. Dit is die tweede grootste denominasie in die Republiek van Ierland met sowat 126 400 lidmate, en die derde grootste in Noord-Ierland met sowat 249 000 lidmate.[1]

Verwysings wysig