Kocatepe-moskee
Die Kocatepe-moskee is die grootste moskee in Ankara, die hoofstad van Turkye. Dit is tussen 1967 en 1987 in die Kocatepe-buurt gebou. Sy grootte en prominente ligging maak dit ’n landmerk wat feitlik van enige plek in Sentraal-Ankara gesien kan word.
| Kocatepe-moskee | ||
| ||
| Die Kocatepe-moskee in Sentraal-Ankara. | ||
| Ligging | Ankara, Turkye | |
| Voltooi | 1987 | |
| Status | Aktief | |
| Argitek(te ) | Hüsrev Tayla en M. Fatin Uluengin | |
| Spesifikasies | ||
| Minaret(te) | 4 | |
| Minarethoogte | 88 m | |
| Koepeldeursnee | 25,5 m | |
| Styl | Neoklassiek-Ottomaans | |
Geskiedenis
wysigDie idee om die Kocatepe-moskee te bou dateer van die 1940's. Op 8 Desember 1944 het die ondervoorsitter van Turkse Godsdienssake en 72 ander ’n nuwe vereniging, die "Vereniging om ’n Moskee in Yenişehir, Ankara te Bou", gestig. In 1947 het die vereniging ’n beroep op argitekte gedoen om projekte voor te lê, maar nie een van die ontwerpe is aanvaar nie.
In 1956 is grond toegeken vir die moskee en die volgende jaar is weer eens ’n beroep om projekte gedoen. Dié keer is 36 ontwerpe oorweeg, en die gesamentlike plan van Vedat Dalokay en Nejat Tekelioğlu is aanvaar.[1]
Die ontwerp was innoverend en modern. Bouwerk het begin, maar weens groot kritiek van konserwatiewe oor die moderne voorkoms is bouwerk stopgesit nadat nog net die fondament gelê is. Later het Dalokay ’n aangepaste weergawe van die moskee gebruik vir die Faisal-moskee in Islamabad, Pakistan, nadat hy in 1969 ’n internasionale kompetisie gewen het. Laasgenoemde moskee is een van die grootstes in die wêreld en kan 24 000 aanbidders huisves. Dit word beskou as die voorloper van moderne Islamitiese argitektuur.[2]
Ná ’n derde kompetisie in 1967 vir ontwerpe vir die moskee in Ankara is ’n meer konserwatiewe of nostalgiese plan van Hüsrev Tayla en M. Fatin Uluengin gekies. Die moskee is in 1987 voltooi. Dit is in ’n Neoklassiek-Ottomaanse styl en is deur verskeie moskees geïnspireer, onder meer die Blou Moskee in Istanboel.
Verwysings
wysig- ↑ "Brochure by the Turkish Ministry of Religious Affairs" (PDF). Geargiveer vanaf die oorspronklike (PDF) op 28 Mei 2008. Besoek op 28 September 2016.
- ↑ As, Imdat, "Vedat Dalokay's Unbuilt Project: A Lost Opportunity," in "The Digital Mosque: A New Paradigm in Mosque Design" Journal of Architectural Education (JAE), Vol. 60, Uitg. 1, 2006, ble. 54-66[dooie skakel]
Eksterne skakels
wysig- Foto's van die Kocatepe-moskee
- Panoramiese 3D-toer van die moskee
- Foto's van Vedat Dalokay se latere Faisal-moskee
Wikimedia Commons het meer media in die kategorie Kocatepe-moskee.
Hierdie artikel is vertaal uit die Engelse Wikipedia
