Koekie (rekenaarwetenskap)

In rekenaarkunde is 'n koekie 'n simbool of 'n klein datapakkie wat tussen kommunikerende programme gestuur word. Die inhoud is onduidelik of betekenisloos vir die ontvanger, maar word geïnterpreteer as dit teruggestuur word aan die aanvanklike sender op 'n latere stadium. Die koekie kan gebruik word as 'n kaartjie; om 'n spesifieke gebeurtenis of transaksie te identifiseer.

Wanneer mens jou inkopiesakkies by 'n winkeltoonbank inhandig en 'n nommer in ruil ontvang - sien mens in werklikheid 'n koekiestelsel in die fisiese wêreld. Die nommer of kaartjie self is betekenisloos en nutteloos vir die houer, maar stel die bediener by die toonbank in staat om die korrekte sakkies weer terug te gee.

HTTP-koekies

Die algemeenste, en miskien mees omstrede gebruik van koekies is op die wêreldwye web. Koekies word deur middel van die HTTP-protokol deur die webbediener gestuur en deur die webblaaier tydelik of permanent gestoor. Die inhoud van die koekie word weer aan die bediener gestuur wanneer dieselfde bediener weer besoek word. Só kan koekies gebruik word om terugkerende besoekers te identifiseer of om die voorkeure van 'n gebruiker te stoor. Dit kan egter ook gebruik word om profiele van gebruikers saam te stel, wat gesien kan word as 'n skending van sensitiewe of vertroulike inligting.

HTTP-koekies is al misverstaan as om groot risiko's te dra, aangesien dit verkeerdelik "programme" genoem is. Dit is in werklikheid bloot klein stukkies data en kan self geen aksie op die leser se rekenaar uitvoer nie. Baie webwerwe maak vandag staat op koekies vir hulle werking en sal nie korrek funksioneer daarsonder nie.

Bronne

• Magic cookie by die Engelse Wikipedia
• HTTP cookie by die Engelse Wikipedia
• Cookie (internet) by die Nederlandse Wikipedia